يعنى ايه برمجه 🤔؟!
يعنى ايه برمجة أصلا🤔؟!
البرمجة باختصار يعنى اني بكتب شويه أوامر ورموز عشان لطلب شي معين من الكمبيوتر و البرمجة عباره عن مهارة ممكن أي حد يتعلمها. هدفها الأساسي هو تحويل الأفكار إلى رموز بطريقه معينه عشان الكمبيوتر يقدر يفهمها.
يعنى ايه رموز (كود)🙂؟!
الرموز او الكود بيكون عباره عن صيغه بكتب بيها الكلام عشان الكمبيوتر يقدر يفهمه يعنى مثلا انا لو هتكلم مع واحد من الدول العربية هكلمه عربي طب لو هكلم واحد امريكي مثلا لازم اكلمه انجلش عشان يفهمني وعشان كده المبرمجين قالوا ان الاكواد والرموز دي بتتقسم الى لغات وكل لغة ليها وظائف معينه.
طب ليه اتعلم برمجة 🙃؟!
عشان بس نكون عارفين ان البرمجة مش صعبه خالص زي م أنتوا فاهمين بس هي بس محتاجه شويه صبر….شويه كتير الصراحة بس عشان نكون عارفين
انت لو بقيت مبرمج شاطر انت ومتخصص في مجال من مجالات البرمجة مش محتاج اقولك هتكون معاك فلوس ازاي ولو تلاحظ معايا مفيش دوله متقدمة غير وهي مهتمة بمجال البرمجة ومش شرط عشان تبدا تتعلم برمجة تستنى لما تخلص تعليم لا خالص ده فيه دول بتبدا تعلم البرمجة من 6 سنين ف متجيش تقولي هستنى لما يكون عندي وقت لا ابدا عشان دلوقتي .
أبدا أزاي 👨🏽💻 ؟!
حلو السؤال ده……
تعال اقولك ممكن تبدا ازاي اول حاجه انت ممكن تاخد كورس برمجه ولكن ده بيكون مكلف شويه بس الصراحة ده من اكتر الطرق الى هتعمل معاك نتيجة او ممكن تاخد كورس اونلاين فري وده كويس بردوا بس بلاش تسمع الكورس وانت نايم هات ورقه وقلم والكمبيوتر الجميل بتاعك واشتغل مع الكورس عشان تحقق اعلى استفادة ولو انت في اعدادي وعاوز تبعد عن ثانوي عام وحابب تدخل في مجال البرمجة فانت محظوظ في مدارس كتير بدأت في تعليم مجالات البرمجي زي ايه بقا ؟!
1- مدرسه السويدي الدولية للتكنولوجيا التطبيقية والبرمجيات
2-مدرسه أحمد ضيف الله الدولية للتكنولوجيا التطبيقية (تكنولوجيا المعلومات والذكاء الاصطناعي)
وفى طبعا معاهد ومراكز واكاديميات لتعليم البرمجة زي:
1-ITI - Information Technology Institute (المعهد التكنولوجي للمعلومات)
2- Cairo Coding Academy (أكاديمية القاهرة للبرمجة)
ايه هي اهم الحاجات الى لازم تعرفها قبل م تبدا :
1-التكرار والممارسة المستمرة. ابدأ بمشاريع صغيرة وتحدى نفسك تدريجياً.
2-مينفعش تقتصر كورس تعلم البرمجة او المدرسة او أيا كان ايه لازم تطور نفسك وتجرب لوحدك خارج وحده التعليم.
3- مينفعش تقعد اكتر من 3 أيام من غير م تكتب كود .
4- لما تقع في حاجه صعبه لازم تحاول كتير جدا وبعد م تحاول كتير ممكن تروح تدور في جوجل براحتك بس بعد م تحاول و كتير كمان.
5-اتعلم اساسيات كويس جدا وخد وقت في الأساسيات لان لو دخلت على طول صدقني هتتعب .
الخلاصة :
البرمجة مش معقدة، و ممكن أي حد يتعلمها بسهولة. ابدأ ببساطة واتعلم برمجة من الصفر واتعلم اساسيات البرمجة، ومتخفش تستخدم المصادر اللي معاك. هتشوف إن البرمجة زي مفتاح بيفتحلك باب الإبداع وتحقيق الأفكار. 💻✨
