اهم 3 نصائح لمن يريد دخول مجال البرمجة وعلوم حاسبات.

في البداية حابب اعرفكم بنفسي انا يوسف . م. ع طالب في كلية الهندسة بجامعة حلوان في مصر، قسم اتصالات والكترونيات و حاسبات. القسم اللي انا فيه في الكلية مختلف عن بقية الاقسام في جميع كليات مصر بحيث انه بيتيحلي اني ادرس مجالين في قسم واحد الاول هو مجال الاتصالات والالكترونيات والتاني وهو موضوع الحديث النهاردة مجال البرمجة.

البرمجة:

في الاول كدا لازم تعرف ان المجال دا من اهم واحلى المجالات اللي اي حد بالمعنى الحرفي سواء درسه في الكلية او اتعلم برا ممكن يشتغل فيه ويتميز فيه، لانه بيعتمد في المقام الاول على مدى فهمك واستيعابك في اللغات اللي بتبرمج بيها، وعشان كدا هو مش بيفرق انت جاي منين او متخرج من كلية ايه بالعكس تماما، هو كل ما يهم في الامر انت بتعرف تعمل ايه . والسوق حاليا متعطش جدا وبيدور على ناس فاهمة بجد في المجال دا لانه لغة المستقبل، مفيش مجال بعد كدا مش هيعتمد على ال software programing كل حاجة مهما كانت ايه بيشوفولها طريقة في الوقت الحالي بيحث تتغطى اغلبها بمجال البرمجة والكمبيوتر. 

تعالى اعرفك شوية حاجات لازم تتعلمهم عشان تبدأ في المجال دا:

1)  numbering system “ انظمة الارقام”: 

احنا كبشر عقلنا بيبدأ يفكر بواسطة المخ والمخ دا بيأدي وظايف عصبية بتخلينا نتحرك ونتكلم ونفهم ونعمل كل حاجة، والكمبيوتر كمان بيعمل نفس الفكرة بس طريقة تفكيره ومعالجة الاوامر مختلفة شوية بحيث بيعتمد على انظمة الارقام دي بق،  الكمبيوتر في العموم عشان يأديلك function “وظيفة" معينة لازم يبدأ يفهمك وهو عقله بيبدا يشتغل بانظمة الارقام دي بين قوسين كدا معلومة ليك على الماشي “binary system” هو دا اللي كمبيوتر بيفهمه 0,1 وبس و لازم تخليه يعالج اوامرك كدا عشان يبدأ يفهمك، وفي انظمة تانية زي ال Octal, Decimal, Hexa decimal ولكل نظام منهم ليه شغله جوا الكمبيوتر وموضوع كبير جدا فانت ابدا بالموضوع دا وهيفيدك بعد كدا بحيث تفهم الية عمل الكمبيوتر.

2)  لغات البرمجة :

بمنتهى البساطة احنا كبشر بنتكلم باكتر من لغة ولو جه حد يتكلم مع شخص اجنبي مش عارفين لغات بعض فمش هيعرفو يتواصلو مع بعض، وهو دا الموضوع بكل بساطة؛ الكمبيوتر بيفهم لغات معينة بس احنا اخترعناها عشان نخليه يبدأ يعملنا اللي احنا عاوزينه امثلة اللغات دي ايه بق لغة ال c , c++, java, java script وزيهم لغات مختلفة كتير وكل لغة بتعمل وظيفة معينة وبتستخدم في تطبيقات معينة في عمل ال software في العموم وعشان كدا اساس البرمجة “ انك تكلم الكمبيوتر” تعرف لغته هو هيقرأ كلامك بانهي لغة.

3) اهم لغات تبدأ بيها:

1. ++C : تعتبر اسهل لغة برمجة تعرف تدخل فيها لانها بسيطة جدا ولكن عيبها انها طويلة شوية وبرده للامانة العلمية لو اتعلمت صح ++c هتعرف تتعلم كل اللغات المشهورة حاليا. 
2. C: و دي هي اللغة الام ل “++c” واكبر تطبيق عليها هي انظمة التحكم الداخلية “Embedded system” ودا اصلا مجال لوحده وهيبقى ليه مقال لوحده من كتر اهميته في حياتنا.
3. Java script: وهنا نبدأ  نقول بدأنا نخش في الجد دا يعتبر من اقوى لغات البرمجة الموجودة حاليا وتطبيقاتها كتير زي android applications ايوة ايوة اللي على موبايلك دي اغلبها معمولة من اللغة دي فتخيل اهميتها في حياتنا عموما.

والاحسن ليك انك تمشيهم بالترتيب زي مانا كاتب ودا عن تجربة شخصية يعني. وبس كدا دا نهاية المقال الموضوع كبير جدا ومحتاج حاجات كتير جدا عشان تحترفه بس صدقني من اول م تبدأ تتعلمه وتعمل مشاريع خاصة بيك فانت معاك كنز حقيقي وهتبقى مطلوب جدا في السوق الحر “free lancer” وفي السوق الخاص كمان.

واهم حاجة لازم تعرفها ان المجال دا سريع التطوير جدا، فلو دخلته لازم تواكب كل جديد وتتعلمه وتشتغل على نفسك عشان تفضل مطلوب ولكن انك تبدأ تتعلمه اصلا دي بداية قوية جدا مش بس عشان مجالات الشغل بتاعت البرمجة دا كمان ليك كمعرفة وهيطور ال CV بتاعك جدا في اي شغل تاني.