معاني الحروف والارقام في معالجات انتل

لو بتفكر تشتري تجميعة جديدة او لابتوب فأول حاجة هتيجي في بالك هي المعالج او البروسيسور، بس اسم البروسيسور بيبقى طويل ومعقد وصعب تقارن مابين واحد والتاني

في المقالة دي هتعرف ازاي تقرأ اسم اي بروسيسور من انتل وتعرف ايه معاني الحروف الي بتبقى في اخر البروسيسور، وبعدها هتقدر تقارن اي معالج من انتل وتعرف ايه الأقوى والأضعف.

 

هناخد مثال نشرح عليه وهو Intel Core i7-8650U

اسم البروسيسور بينقسم لـ3 اجزاء رئيسية، اول بيبقى فئة المعالج وده الي منتشر واغلب الناس تعرفه، انتل فيها 4 فئات رئيسية بتبدأ من Core i3 - Core i5 - Core i7 - Core i9 وكل ما كان الرقم اكبر كل ما هتاخد اداء اعلى، اضعفهم i3 و أقواهم i9.

 

بعد فئة البروسيسور بييجي رقم الجيل الي هي في الأغلب الـ4 ارقام، يهمنا منهم رقم الجيل، انتل كل سنة بتنزل جيل جديد وحاليًا فيه 11 جيل، كل ما كان الرقم اعلى كل ماخدنا اداء اقوى، في حالتنا البروسيسور بتاعنا هو i7 الجيل التامن عشان اول رقم هو 8.

 

بعد رقم الجيل بيبقى فيه 3 ارقام تانيين، دول بيبقوا اسم الموديل ذات نفسه لأن كل جيل بيطلع بيتعمل منه اكتر من موديل، وبرضه كل ما كان الرقم اكبر كل ما كان الأداء اعلى.

 

نيجي بعدها لأهم حاجة في اسم البروسيسور وهو الحرف الأخير، كل حرف بيدل على مدلول معين في البروسيسور، اشهر الحروف بتبقى كالآتي:

1- حرف U: وده اختصار لـUltra-low power وده بيبقى الأكتر انتشارًا في اللابتوب ومعناه ان البروسيسور متقلل في اداءه عشان يبقى موفر للطاقة وميسحبش من البطارية كتير.

2- حرف H: وده اختصار لـ High performance اي معالج في اسمه H فهو موجه لللابتوبات برضه وهيديك اداء اعلى من الـU.

3- حرف HQ: وده اختصار لـ High performance graphic وده باين من اسمه معالج موجه للجرافيك اكتر وهيديك اداء كويس وحرف Q الي فيه معناه Quad core يعني رباعي النواه.

4- حرف K : وده اختصار لـ Unlocked وده معناه ان المعالج مفتوح وتقدر تعمله حاجه اسمها كسر سرعة عشان توصل لأداء اعلى من الطبيعي، وممكن نتكلم عن كسر السرعة في مقال تاني.

5- حرف HK: وزي ما انت توقعت معناه ان الكارت اداءه عالي وموجه للجرافيك وفي نفس الوقت ممكن تكسر سرعته.

6- حرف G : المعالج مدمج فيه كارت شاشة داخلي وده الناس بتجيبه لو عاوزه توفر في الفلوس ومتشتريش كارت شاشة.

7- حرف F: المعالج مفيهوش كارت شاشة داخلي ولازم تشتري كارت شاشة معاه عشان تقدر تشغل الكمبيوتر.

 

نرجع تاني للمثال بتاعنا Intel Core i7-8650U:

ده معناه ان البروسيسور من فئة I7 والجيل التامن وموديل البروسيسور هو 650 و U معناها ان الكارت موفر للطاقة.

 

ملخص كلامناا ان لو بتفكر تشتري معالج للجرافيك في لابتوب هتبعد تمامًا عن اي بروسيسور فيه حرف U وتدور بالترتيب على HK او HQ او H

اما لو هتجيب تجميعة فانت هتدور على K او F لو ناوي تشتري كارت شاشة معاها، ولو مش هتشتري كارت يبقى تدور على حاجة مدمج فيها كارت داخلي الي هي G

وبكدا نكون شرحنا Intel وفي مقال تاني ان شاء الله هنشرح معالجات Ryzen المنافسة لأنتل.