تعلم البرمجة للمبتدئين من الصفر شرح مختصر

تعلم البرمجة

مع كل التقدم والتطور اللي التكنولوجيا وصلتله النهاردة أصبحت البرمجة من أهم المجالات السائدة في العالم كله في الفترة دي والطلب على المبرمجين بيزيد يوم بعد يوم وطبعا مش محتاجين نتكلم على الأجور اللي بيتلقاها المبرمجين مقابل شغلهم واللي تقريبا ده السبب الأول اللي بيخلي أي حد يفكر إنه يتعلم برمجة في المقالة دي هتكلم عن تجربتي في تعلم البرمجة وازاي دخلت في الموضوع والغلطات اللي وقعت فيها عشان محدش يكررها

الأساسيات

أهم حاجة في أي مجال انت عايز تدخله وتتعلمه هي الأساسيات لأنك لو ظبطت الأساسيات كده انت ضمنت انك تبقا متميز وفاهم كل حاجة في التخصص بتاعك صح وتقدر تفيد أي حد طالما انت متأسس صح

وهنا المجتمع التقني بيختلف يعني لو سألت ايه الطريق اللي المفروض امشي فيه لو أنا معرفش أي حاجة عن البرمجة هتلاقي كل واحد بيقول إجابة غير التاني لدرجة انك هتلاقي نفسك بترجع لنفس السؤال تاني أيوة بردو يعني أعمل ايه؟

والإجابات على السؤال ده بتبقا غالبا واحدة من 3 إجابات:

1-أبدأ بالcomputer science 

2-أبدأ بلغة برمجة قوية زي ++C أو Java

3-أبدأ بلغة سهلة زي الHTML

وانا عن نفسي مبفضلش أخر اختيار ده خالص بس ده اللي انا بدأت بيه!

طبعا معرفتش انه غلط غير لما سمعت الأراء التانية واقتنعت بيها والغلطة بتاعتي هنا إني دخلت في مجال جديد من غير ما أعرف عنه حاجة بس كانت الHTMLهي أول حاجة قابلتني فاتعلمتها

أما بالنسبة للرأي الأول فانا شايفة أنه أفضل طريقة تبدأ بيها لأن الcomputer science بيفهمك الكمبيوتر ده بيشتغل أزاي أصلا فتقدر تعرف كل حاجة فيه بتشتغل ازاي وتقدر توظفها في مكانها الصحيح وتبقا فاهم ايه اللي الكمبيوتر ممكن يعملهولك وبعد ما تخلص تدخل على لغة قوية ويفضل ++C لكن طبعا في لغات تانية كتير زي Java  و Python  و C (بس هي لغة قديمة شوية) و#C وJavascript (ودي طبعا غير الJava اللي فوق)

ما بعد الأساسيات

بعد ما اتعلمت computer science  وأخدت لغة قوية زي ++C كده انت قطعت شوط كبيرأوي تقدر بقا تشوف مجالات البرمجة 

البرمجة فيها مجالات كتير جدا منها : 

1. Web Development
2. Mobile App Development
3. Game Development
4. Artificial Intelligence
5. Machine Learning
6. Data Science

طبعا في السؤال بتاع ايه أفضل مجال فيهم؟ والحقيقة ان مفيش حاجة اسمها كده لأن كلهم مجالات عظيمة جدا وفيها شغل كتير بس في حاجة اسمها ان كل دولة الوظائف المطلوبة فيها بتبقا غير الدول التانية فانت ممكن تدور وتشوف في بلدك أنهي مجال سائد أكتر وتختار انك تبدأ بيه

طبعا المصادر اللي هتتعلم منها كل الحاجات دي مش هتعمل أي مشكلة إطلاقا لأن في مصادر كتير جدا وأولهم طبعا اليوتيوب 

اليوتيوب مليان ناس عظيمة جدا بتشرح كل الحاجات اللي قولت عليها فوق وفي مقالة تانية ان شاء الله هوضح فيها مين أفضل الناس اللي تابعتهم واستفدت منهم بناء على تجربتي الشخصية

بردو هنا في سؤال يا ترى فيديوهات اليوتيوب هتعلمني وهبقا في نفس المستوى اللي ممكن أتعلمه لو أخدت كورس مدفوع سواء أونلاين أو أوفلاين؟

والإجابة هي اه وأكتر كمان اليوتيوب حرفيا في كل حاجة وكل مجال معين أو لغة برمجة معينة هتلاقي كذا حد بيتكلم عنها(والحتة دي كانت عملالي مشكلة هبقا أتكلم عنها بعدين)يعني لو شرح فلان معجبكش تقدر تشوف غيره

الميزة الوحيدة في الكورسات المدفوعة هي الإلتزام لأنك هتبقا ماشي مع المدرب بتاعك خطوة بخطوة وهيتابعك لكن اليوتيوب مصدر مفتوح مفيش حد بيتابعك فيه بس انت لو تقدر تلتزم لوحدك وتذاكر كل يوم وتهتم يبقا وفر فلوس الكورسات المدفوعة وخليك في اليوتيوب

بعد ما أخدت computer science واتعلمت ++C وعرفت تختار أكتر مجال أنت حابه وبدأت فيه واتعلمته كده خلاص انت بقيت مبرمج (وكلمة مبرمج هي كلمة عامة جدا لأن المسمى الوظيفي بيختلف من مجال للتاني) تقدر تبدأ تدور على شغل وبالمناسبة تقدر تدور على شغل من وانت لسه بتتعلم عادي مش لازم تستنى لما تخلص ولكن فرضا انك خلصت كل اللي احنا قلنا عليه تقدر بقا تدور على شغل في شركة واه مش لازم شهادة عشان تشتغل في شركة أهم حاجة الخبرة

 أو تبدأ freelancing على مواقع زي خمسات و fiver 

طبعا الموضوع مش بالسهولة دي الطريق طويل جدا وده اللي مكنتش قادرة أستوعبه لأني كنت عايزة أتعلم بسرعة عشان أشتغل بسرعة لكن بعدين أدركت إن البطء اللي أنا ماشية بيه ده هو اللي هيوصلني للي أنا عايزاه 

 "Slowly Is The Fastest Way To Get To Where You Want To Be "

  Andre De Shields

-Habiba