السوشيال ميديا و تأثيرها في العلاقات الإنسانية
بحثت كتير لحد ما عرفت أختار أنسب و أبسط كلام أقدر بيه أوصلك سبب كتابتي للمقال دا بلغة عامية قادرة تفهمك و توصل الفكرة اللي أنا هتكلم فيها و كل ده في منتهي الإيجاز.
عمرك سألت نفسك إيه سبب إنشاء مواقع السوشيال ميديا و مواقع التواصل الاجتماعي؟
ممكن علشان نتواصل مع أصدقائنا بسهولة، أو نتواصل مع ناس في دول تانية.
و ممكن علشان نشارك حياتنا اليومية.
طيب عمرك فكرت إن ممكن يكون علشان التجسس علينا؟
أو يأثروا على دماغنا؟
أو أيَّاً كان السبب سواء سبب كويس أو لأ.
دلوقت حد لاحظ تأثير السوشيال ميديا عليه؟ مش كلنا أكيد و دي بتختلف حسب مدة استخدامنا ليها و المحتوى اللي بنتابعه و سننا و قدراتنا العقلية و غيره.
دلوقتي السوشيال ميديا بتكون سبب في تكوين شخصية و تفكير الأشخاص من
عمر ١١ سنة إلي ٢٠ سنة من وجهة نظري، و
بعضهم هتلاقيه بيشتكي من اكتئاب و خوف و قلق و وسواس قهري و قلة ثقة بالنفس و رغبة في الانتحار و ومش بعيد السبب يكون بسببها.
دي ضيعت علينا لمة زمان و قعدة صحاب زمان و لمة العيلة و العادات الجميلة اللي اتربينا عليها و مفتقدينها دلوقتي بشكل كبير، و بقي كل واحد فينا دلوقتي بيقعد مع التاني و وشه في شاشة موبايله فيبقي بنتقابل ليه طيب.
في دراسة اتعملت بتقول إن في زيادة كبيرة جدًا في معدلات الاكتئاب و القلق بين المراهقين الأمريكيين بين عامي ٢٠١١ و ٢٠١٣ و في حوالي عامي ٢٠١٠ و ٢٠١١ كانت الأعداد مستقرة بعدها بدأت ترتفع أعداد الفتيات اللي دخلوا المستشفى بسبب إنهم بيسببوا لأنفسهم أذى ودا اللي بيتزامن مع إنشاء مواقع السوشيال ميديا، و كذلك في حالات الانتحار، و خد معلومة الجيل اللي يكون أول جيل في التاريخ استخدموا وسائل التواصل في الإعدادي بيُسمّوا بجيل "زد".
مش حاسين بقي إن السوشيال ميديا بقت بتاخد مُنحنى غلط؟ و خطر ….
بقت السبب في فساد أجيال و أجيال، و أنشأت أجيال هشّة نفسيًّا و عندها اكتئاب و قلق زيادة عن الطبيعي و كسل و عدم همة و عدم صبر، أجيال بتهتم بالتفاهات، و بقي عندها إدمان لشهرة زايفة، و هتلاقي ناس كتيرة عندها أحلام و طموحات مُذهلة بمعنى الكلمة، بس السوشيال ميديا حابساهم كدا في عالم تاني، لو طلعوا منه هيحققوا أحلامهم بس هما مش عارفين يطلعوا منه لإنه حلو و ممتع و بيقتل الوقت وفي نفس الوقت متعب و مريع.
إحنا منقدرش ننكر إنها كانت في إنقاذ حيوات ناس كتيرة، وإنها ساعدت ناس كتيرة في كذا حاجة، ووفرت فرص عمل لشباب، وناس بقوا صحاب بسببها، بس أنا شايفة ضررها أكتر من نفعها لإن ليها جانب مظلم مش شايفينه، في أشخاص هنا بتتأثر وبيتزرع في دماغها أفكار وهي مش حاسّه، أفكار بتُنافي الدين الإسلامي وبتنافي الواقع، مثلًا يطلع واحد يقولك الأرض مسطحة ويجيبلك أدلة العقل البشري مش مُقتنع بيها أصلًا!
في الآخر عايز أقول إن المفروض ناخد بالنا أوي أوي بجد إحنا بنتابع إيه ومين كويس، و منفضلش كل يوم نعمل سكرول في الفيس أو أي أبليكيشن سوشيال ميديا كدا بلا هدف.
حدد وقت معين، و حدد هدف من استخدامك، أكيد يعني لو تابعت حاجات تافهة هتطلع تافه مستني يعني تطلع إيه؟ شغل دماغك….
لو عرفنا نستخدمها صح بالعقل و بضوابط و التزامات هنطلع بفايدة كبيرة و دا اللي نادرًا يعني هيحصل لإن زي ما في الخير في الشر.
في المقال القصير ده حبيت بس أنبهك إن ممكن السوشيال تكون هي السبب في حُزنك، ضيقك بلا سبب، تهربك من المشاكل، كسلك، أو عدم قدرتك على محاولة حتى إنك تجرب تحقق أهدافك.
اتحكم فيها بجد بلاش هي اللي تتحكم فيك.
فكر في كلامي و فكر تعمل حاجة صح في حياتك و لو مرة.
