أسرار مطبخ المحتوي: ج٣ عن كتابة المحتوي من الصفر إلي الإحتراف
🔸من ضمن الأهداف اللي ممكن تكون بتكتب المحتوي عشان تحققها:
- إنك تبدأ تعرف الجمهور بالمنتج أو الخدمة بتاعتك و تقولهم معلومات عنها بحيث تخلق عندهم وعي بيها Awareness.
- تعرف رأي الجمهور في المنتج أو الخدمة.
- بتقدم محتوي فيه معلومات قيمة هتفيد الناس و عايزهم يعملوا Share علشان يوصل لأكبر قدر من الناس و يستفيدوا.
- التسلية و الضحك أو بتشارك جمهورك مناسبات معينة زي التهاني و المباركات.
و غيرها من الأهداف الكتير، المهم إنك قبل ما تكتب الـ POC بتاعتك تكون عارف و محدد هدفك اللي عايز توصله من خلالها، لإنك لو مش عارف هدفك مش هتعرف تحدد:
١) نوع و مشكلة المحتوي.
٢) مش هتعرف تطلع فكرة المحتوي.
٣) مش هتعرف تحدد الـ Call To Action (الفعل أو الإجراء اللي عايز جمهورك يعمله بعد ما يخلص قراءة المحتوي).
٤) بالتالي مش هتعرف تعمل تقييم (Evaluation) للمحتوي لإن معندكش KPIs (مؤشرات قياس الأداء) اللي من خلالها تقدر
تعرف إن المحتوي حقق الهدف منه.
🔸 ازاي تقدر تجيب أفكار للمنتج أو الخدمة اللي بتقدمها؟
- مبدئياً كدة عشان تقدر تطلع افكار مفيدة، لازم تكون عارف كل حاجة عن البيزنس اللي بتكتب عنه:
مميزاته - عيوبه - سعره - الجمهور المستهدف - المنافسين بتوعي - رأي الناس فيه ....
و كل حاجة تخص البزنس دا لازم تكون عارفها كويس أوي.
- محتاج تكون بتحب البحث و القراءة و الإطلاع دايماً.
🔸 طب إزاي بقي تجيب الأفكار دي؟
- تسأل جمهورك سؤال مباشر عن المحتوي اللي عايز تتكلم عنه.
- تعرف من خلال أسئلتهم و تعليقاتهم المشاكل اللي بيواجهوها و تبدأ تكتب عنها و تقدم حلول.
- تشوف صفحات المنافسين و اللي بيقدموه و رأي العملاء فيهم بحيث تقدر تعمل محتوي تنافسهم بيه.
- ادخل اليوتيوب لإنه فعلاً كنز و أعمل بحث فيه عن الكلمات المتعلقة بالمجال اللي بتكتب عنه، هتلاقي سيل من الأفكار طلعلك.
- أعمل بحث علي الفيسبوك و جوجل بالكلمات المتعلقة بالمجال اللي بتكتب عنه و شوف كمية الأفكار اللي هتطلعلك.
- أقرأ كتير عن المجال اللي بتكتب عنه.
- أدخل علي الجروبات المتعلقة بالمجال اللي بتكتب عنه و أعرف بيتكلموا عن إيه.
- اتفرج علي صور متعلقة بالمجال اللي هتكتب عنه، علي موقع زي Pinterest و أعمل لنفسك تغذية بصرية كدة هتلاقي دماغك نورت فيها أفكار كتيرة جداً.
- الناس دايماً بتخاف تفقد اللي معاها و بتتفاعل مع أي محتوي بالشكل دا، بمعني لو قلت لجمهورك ( انتا ممكن تخسر العملاء في حالة كذا و كذا ....)، هتلاقيه عايز يقرأ عشان يعرف لإنه خايف يحصل معاه كدة.
- متابعتك للتريندات و ربطها بالمحتوي بتاعك مهم جداً، بشرط انك تعرف توظف التريند في محتواك، لإنك لو استخدمته و خلاص ساعتها هيجيب نتيجة عكسية، و تقدر تتابع للتريندات من خلال Google Trends.
- اكتب اي فكرة تيجي ف بالك في اي وقت و انتا ماشي أو في أي مكان و شوفت حاجة بسببها جت في دماغك فكرة محتوي، فأكتبها علي طول عشان متنسهاش.
- ممكن تسأل باقي الـ Team اللي شغالين معاك زي خدمة العملاء أو الـ Moderators لإنهم بيتعاملوا كتير مع العملاء و هتقدر تطلع منهم بأفكار كتير.
- شوف أشهر الهاشتاجات في المجال اللي بتكتب عنه علي تويتر و انستجرام و الفيسبوك ممكن تلاقي أفكار انتا لسة مكتبتش عنها خالص.
- شوف المحتوي الأجنبي اللي مكتوب في نفس المجال اللي بتكتب عنه، و أعرف الأفكار اللي بيتناولها و هتلاقي نفسك بتكتب أفكار غير أفكار منافسيك خالص .
- لو عندك محتوي قديم كان محقق نجاح كبير، ممكن تعيد صياغته بشكل جديد و تضيف فيه معلومة جديدة.
- و لو عطلت خالص تقدر تنزل بوستات عامة، يعني أقوال مشهورة تحفز بيها الناس و تشجعهم، و شير Comics - gif - Mems.
و بكدة عمرك ما هتلاقي نفسك مش عارف تطلع أفكار.
🔸 مهارة البحث مهمة جداً و لازم تكون موجودة عند كاتب المحتوي، لإن أكيد بعد ما عرفنا نقسم جمهورنا لـ Personas، و عرفنا نطلع الأفكار اللي هنكتبها، جت خلاص خطوة الكتابة.
🔸 و هنا تظهر مهارة البحث لإن من غيرها مش هتعرف تقدم محتوي حصري و مميز و بيقدم قيمة فيها إضافة لجمهورك.
🔸 طب ازاي اعمل خطوة البحث؟
- بعد ما عرفت الفكرة اللي عايز تكتب عنها الـ POC، بتدخل علي جوجل و تعمل بحث بالكلمات المتعلقة بالموضوع اللي هتكتب عنه، و تشوف و تقرأ كل المكتوب في المجال دا، و لو شوفت المحتوي الأجنبي اللي بيتكلم عن نفس الفكرة بتاعتك، هتطلع بمعلومات مميزة جداً، هتخليك فعلاً تكتب POC حصرية بتقدم فيها قيمة حقيقية لجمهورك.
🔸 ابحث و اقرأ في أي مكان ممكن تلاقي فيه معلومات عن المجال اللي هتكتب عنه، و دي الحاجة الوحيدة اللي هتخليك تكتب محتوي أعلي من محتوي منافسيك، و لازم برضه تشوف منافسيك بيكتبوا إيه عشان تعلي علي المحتوي بتاعهم.
و بكدة انتهي الجزء الثالث من سلسلة مقالات أسرار مطبخ المحتوي و يارب أكون فعلاً بقدم محتوي مفيد ليكم و أنتظروا الجزء الرابع.
