الأمن السيبراني وخطورته
علطول بنسمع عن الأمن السيبراني والجرائم اللي بتحصل عن طريق الهاكرز وممكن تتسبب في الموت انت متخيل! والحقيقة ان الجرائم دي بيكون ليها أكتر من سبب ولكن تعالى ناخد نبذة سريعة ونتكلم عن أهمية وفوائد الأمن السيبراني وازاي تقدر تتفادى الهجمات الإلكترونية.
في عصرنا الحالي مفيش شك ولو واحد في المية أن التكنولوجيا أصبحت هي جزء كبير جدا من حياتنا وشئ أساسي, ومع استخدامنا المستمر للتكنولوجيا احيانا بنتعرض للقرصنة أو سرقة البيانات والمعلومات, في الوقت ده الأمن السيبراني مبقاش مجرد اختيار بقى شئ اجباري, مينفعش يكون جزء كبير من وقتك على أجهزة التكنولوجيا وبتشارك معلوماتك معاها وبتنفذ معاملات مالية وبعد كل ده ميكونش عندك وعي بالأمن السيبراني وازاي تتفادى الهجمات الإلكترونية وسرقة البيانات.
فوائد الأمن السيبراني:
1- حماية البيانات الحساسة:
عادة ما بنشوف ناس بتتفاجئ إن بياناتها تم تسريبها في مواقع متعددة ويصحى الصبح على رسالة" تم تغيير الإيميل الخاص بك" أو ما شابه وده لانه مهتمش ازاي يحمي بياناته والحقيقة ان بياناتك دي أيا يكن تمنها في نظرك هي أكيد ليها تمن وبيتم بيعها.
2- منع الإختراقات وتقليل الخسائر:
كم الهجمات الإلكترونية اللي بنسمع عنها كل ما بنبحث بس عن كلمة الأمن السيبراني, شركات ومؤسسات ضخمة بيتم سرقة بيانات منها تكاد تساوي ملايين أو مليارات الدولارات, وخاصة البنوك, تخيل بنك ممكن يتسرق منه بيانات عميل واحد بس مش البنك كامل عميل واحد بس ممكن يكون عميل مميز وبالتالي الهاكر دخل في منطقة ال6 أصفار بدون ما يحتاج يخترق ملفات تانية.
3- تحسين ثقة العملاء:
لما يكون عميل في بنك مثلا يصحى الصبح يلاقي ان تم سحب مبلغ وقدره من حسابك تلقائي هيروح للبنك اللي مسجل حساب عنده وإن تم كشف ان بياناته تمت سرقتها بديهي يرفع قضية ويطالب بماله بالإضافة إلى الثقة اللي مش فقط اتهزت دي ممكن تكون انتهت وكل ده بسبب غلطة واحدة بس.
4- تأمين التحول الرقمي:
كل ما زاد استخدامنا واعتمادنا على التخزين الإلكتروني كل ما بيزيد خطر التعرض لسرقة البيانات أو غيرها
تعالى نتكلم عن أشهر الهجمات الإلكترونية اللي هزت العالم:
1- اختراق شركة Yahoo عام 2013 -2014
وده كان أكبر اختراق بيانات في التاريخ وده لان ان اللي اتسرب مش بيانات شخص ولا 1000 شخص اللي اتسرب حوالي 3 مليار حساب تقريبا وده معناها خسارة ملايين أو مليارات الدولارات.
2- اختراق شركة Facebook
وده نقدر نقول كان اخف شوية من ياهو من ناحية العدد, لان في شركة فيسبوك تم تسريب حوالي 540 مليون مستخدم, ملاحظ اننا بنتكلم كل ده فوق المئة مليون حساب انت في العالم الحالي في السرقة بتتكلم بالملايين والمليارات وده اللي ممكن يخلي شركة أو مؤسسة يتم هدمها بالكامل بسبب عملية اختراق واحدة.
تعالى ناخد حاجة من قريب وبعيدا عن حسابات السوشيال ميديا :
1- اختراق Colonial pipeline عام 2021
ودي أكبر شركة نقل وقود في الولايات المتحدة تخيل اختراق شركة من النوع ده ممكن يتسبب في ايه, اللي حصل ان حصل هجوم فاريس فدية على الشركة وده بالتالي أدى لإيقاف الإمدادات لعدة ولايات, وتعالى بقى نشوف لغة الأرقام, الشركة اضطرت إنها تدفع 4.4 مليون دولار علشان ترجع أنظمتها مرة تانية.
وتخيل معايا ان أحيانا يتم استهداف قواعد عسكرية وده بيبينلك إنه مش مجرد هجمات إلكتروني دي ممكن تستخدم ك سلاح قوي جدا في الحروب.
وللاسف الإختراق لا يعتمد مؤسسات, مستشفيات, حكومات وبالتالي الخسائر قد تصل للموت لما يكون بيانات مستشفى بالكامل تتسرب أو تخترق ويتم تشفيرها والبيانات دي غاية في الأهمية ممكن التأثر ده يتسبب في حالات من الوفيات.
طرق اجتناب الإختراق:
1- زيادة الوعي بالأمن السيبراني:
عن طريق السماع للمختصين في المجال, قراءة المقالات, حضور الندوات التي تخص الأمن السيبراني.
2- بالنسبة للماليات عدم الرد على الرسائل التي تتضمن" تم ايقاف حسابك البنكي" أو “تحديث بيانات الحساب” أو ما شابه
3- استخدام كلمات مرور قوية في حساباتك الشخصية حتى لا تكون فريسة سهلة للمخترق.
4- عدم تنزيل البرامج أو الألعاب المقرصنة أو ما تعرف ب “الكراك”
وفي النهاية عليك أن تعلم ان الوعي بالأمن السيبراني أصبح إجباري وليس إختياري لتأمين معلوماتك في عصر التكنولوجيا.
