شغل اون لاين بالدولار سنة 2024
شغل اون لاين بالدولار سنة 2024
كلنا عارفين إن الشغل أهم حاجه في حياتنا، وإنه بيحمينا من مشاكل وأزمات خطيرة. منها الفراغ اللي بيدي فرصة للشيطان إنه يقرب مننا ويوسوس لنا. مع الفراغ بتكتر الذنوب ومع الذنوب النفسية بتدمر بسبب الندم وجلد الذات. الشغل بيوفر لنا الفلوس اللي بنحتاجها في كل أمور حياتنا. اليومين دول الأسعار بقت غالية وكمان الذنوب كتير، يبقى الشغل هو الحل الوحيد. طب لو مفيش شغل بسبب البطالة يبقى لازم يكون فيه حل، والحل دا هو الشغل أون لاين.
القبض بالدولار
ليه كل الناس عايزين يقبضوا بالدولار؟ ببساطة علشان الدولار كل يوم يزيد، ولما الفلوس توصل لهم بالدولار يحولوها جنيه مصري وده هيخلي المبلغ أكتر بكتير من اللي بيقبض بالجنيه المصري. الناس محتاجين يحسنوا دخلهم علشان يحاربوا الغلاء ويقدروا يعيشوا في مستوى مناسب لهم ولأولادهم، وعلشان كدا كله بدء يستغل وجود الأجهزة والإنترنت في خلق نوع جديد من الشغل اللي هيكون شغل إضافي هيحسن الدخل.
الشغل أون لاين
كل الناس في الفترة الأخيرة فتحوا عيونهم على الشغل أون لاين عن طريق الإنترنت، ودا بسبب توفر الإنترنت والأجهزة في كل بيت تقريبًا. ودي الطريقة الوحيدة اللي هتخليهم يلاقوا فرصة شغل برا مصر وبعيد عن الزحمة والبطالة. لو معاك فون أو أي جهاز زي الكمبيوتر أو اللاب توب، هتقدر تدور على شغل إضافي يناسب مهاراتك أو يناسب أي معرفة بتملكها مهما كانت بسيطة في وجهة نظرك، ولكنها قيمة لو هتبيعها لناس هتقدرها.
ايه المطلوب مني عشان اشتغل أون لاين؟
الحمد لله الشغل عبر الإنترنت كتير ومش مطلوب فيه مؤهلات ولا خبرة، ولكن مطلوب فيه إنك تتعلم شوية مهارات من اليوتيوب ويكون عندك إصرار على النجاح. يعني مينفعش تجرب حظك يوم ولا اتنين وتزهق بسرعة. لازم الأول تحدد المجال المناسب لك لمهاراتك أو مواهبك، وبعد كدا تبحث عنه في كل مكان لحد ما توصل للمواقع المتخصصة في المجال دا، أو توصل للجروبات اللي متجمع عليها ناس اشتغلوا قبلك في نفس المجال، علشان تستفاد من خبرتهم.
إيه أنواع الشغل الأون لاين؟
موجود على الإنترنت أو عن بعد عدد كبير من الوظائف اللي تناسب كل الناس، وكل وظيفة لها مواقع وأماكن مخصصة للتقديم من خلالها، والتسجيل عليها بيكون سهل ومتاح لكل الناس. موجود مواقع لا حصر لها إسمها مواقع العمل الحر، ودي عليها وظائف بتنزل كل ثانية من عملاء من جميع أنحاء العالم، كل المطلوب منك تسجل وتدخل تعمل بروفايل محترم عليه شوية أعمال سابقة لك، وتبدء تعرض نفسك على العميل.
التدريس والكورسات
أكتر شغل منتشر اليومين دول هو التدريس والكورسات، ودي وظيفة مناسبة لأي شخص عنده أي معرفة، سواء كانت دراسية أو مهارة معينة، تقدر تعلمها لأشخاص تانيين في مقابل مبلغ معين تتفق مع الزبون عليه. ولما أقولك أي مهارة فعلا أي مهارة هتلاقي لها زبون عايز يتعلمها. يعني ممكن تعلم الناس أي فن من الفنون أو حتى تعلمهم لغات. وممكن كمان تعلمهم الطبخ أو عمل الحلويات وغيرها من المهارات.
الكتابة والترجمة
لو عندك مهارة الكتابة بأي لغة وأي نوع من أنواع الكتابة، زي القصص الرومانسية أو القصص المرعبة اللي حصلت بالفعل وكمان المقالات المتنوعة، هتلاقي شغل كتير ومميز في المجال دا. لو عندك معلومات في مجال معين زي المجال الطبي أو التقني والهندسي، بردو هتلاقي شغل كتابة في مجالك، في مواقع مشهورة للكتابة مقابل الربح تقدر تسجل من هنا بكل سهولة في موقع أموالي، وتدخل تكتب أي محتوى بتعرف تكتبه، وهتكسب مقابل مادي كويس. والترجمة كمان زي الكتابة بالظبط، يعني لو بتعرف تترجم من أي لغة للغة تانية هتلاقي شغل كتير على مواقع العمل الحر، أو المواقع المختصة بالترجمة.
التصميم
المجال دا يعتمد على الحس الفني و تنسيق الألوان، ويعتبر من أكثر الوظائف المطلوبة اليومين دول بسبب احتياج لوجوهات وبنرات وعدد كبير من التصميمات في كل المنتجات الموجودة حوالينا. فيه تصميمات بتتحط على الملابس وفيه تصميمات خاصة بعبوات المنتجات. والشغل دا بيحتاج كام برنامج يساعدك في التصميم وكام موقع مشهورين عليهم تصميمات جاهزة هتاخدها وتبدء تعدل عليها لحد ما تصمم حاجة خاصة للعميل.
التسويق
شغل التسويق يعتبر من الوظائف السهلة واللي مش محتاجة مهارات كتير، ماعدا تجميع عدد كبير من الناس على مواقع التواصل واستهداف الجمهور المناسب للمنتج اللي شغال عليه. فيه نوعين من التسويق، تسويق لنفسك والمنتج إنت بتبيعه للناس، أو تسويق بالعمولة، ودا بيع منتج خاص بشخص آخر أو تريند معين، وبتاخد نسبة على كل قطعة تبيعها. وفيه مواقع كبيرة عندها فرصة إنك تشتغل معاهم تسويق بالعمولة.
إدارة الصفحات
فيه صفحات كتير عليها عدد متابعين كبير، ودا بيحتاج شخص نشيط يدير الصفحة وينزل بوستات بانتظام ويرد على المتابعين بشكل منتظم. الشغل دا سهل وموجود على مواقع التواصل المختلفة. كل المطلوب منك إنك تدور على صفحات عليها عدد ضحم من المتابعين وتنتظر إحتياجهم لشخص يدير الصفحة، أو تقدر تبعت لهم رسالة تعرفهم إنك مستعد للنوع دا من الشغل.
الفويس أوفر
شغل الفويس أوفر من الوظائف اللي محتاجة صوت مميز، ودا علشان تقدر تقدم بيه إعلانات متنوعة أو أي محتوى تاني زي الكتب الصوتية والوثائقي. فلو عندك صوت قوي ومميز بشهادة اللي حواليك دور على شغل الفويس أوفر وشوف محتوى عنه عاليوتيوب وابدأ جهز نفسك للشغل دا. النوع دا من الوظايف هيحتاج مايك ولاب توب علشان تسجل صوتك بشكل احترافي، ولازم تتعلم مونتاج وهندسة صوتية علشان تظبط الصوت قبل ما تبعته للعميل.
إيه الأدوات المطلوبة؟
النوع دا من الشغل بيكون عبر الإنترنت، يبقى لازم يكون معاك إنترنت قوي وجهاز مناسب لنوع الشغل. يعني لو هتشتغل فى التسويق هيكفيك الفون، لكن شغل التصميمات والبرمجة بيحتاج جهاز قوي، أما شغل التدريس بيحتاج لابتوب وبرنامج الزوم مثلا. يبقى لازم تحدد نوع الشغل الأول وبعد كدا بتحدد نوع الجهاز اللي هتستخدمه.
مميزات الشغل اون لاين
لو فكرت في النوع دا من الشغل هتلاقي له مميزات كتير لأنك ممكن تقوم به من أي مكان في العالم، وده هيساعدك تشتغل مع عملاء من دول الخليج ومن كل دول العالم. وكمان هتقدر تشتغل من البيت بدون سفر ولا مواصلات، وده بيقلل المصاريف ويوفر في الوقت. وأهم ميزة إنك هتقبض بعملات أجنبية تقدر تحولها للجنيه المصري ودا هينعش حالتك الإقتصادية ويحسن دخلك بصورة كبيرة.
هل الشغل اون لاين لوحده كفاية؟
إذا كان عندك وظيفة أساسية فالأفضل تشتغل أون لاين في وقت فراغك، ويتحسن عدم الإعتماد على الأونلاين لوحده، بسبب المشاكل اللي ممكن تحصل لو العميل استغنى عنك، أو جهازك حصل فيه مشكلة. أما لو مفيش عندك وظيفة أساسية زي ربات المنزل اللي محتاجين شغل من البيت، فالشغل عن طريق الإنترنت هيكون كافي لهم.
الخلاصة
بعد ما تعرفنا على أهمية الشغل عمومًا وعلى الشغل اون لاين خصوصًا، هنقدم سلسلة من المقالات عن كل نوع من أنواع الوظائف اللي اتكلمنا عنها، ونقدم لينكات لمواقع متخصصة بكل وظيفة تقدر تسجل عليهم وتبدأ تدور على عملاء حقيقين وتقبض أول دولار لك من شغلك عبر الإنترنت، تابع البروفايل علشان تشوف كل جديد، واكتب في التعليقات نوع الشغل اللي حابب نقدم لك كل التفاصيل عنه لحد ما توصل لأول عميل.
