هل الالعاب لها دور في تطور العقل؟

 🎲 مين قال الألعاب ما الها فائدة؟
نظرية الألعاب (Game theory) ظهرت بسبب رجل كان مهتم بالبوكر، بس طبعاً هاد الزلمة ما كان حدا عادي بل كان عالم رياضيات وفيزياء بالإضافة أنه عالم حاسوب، اسمه John von Neumann. 
كان هدف جون أعلى من أنه يكون لاعب بوكر أفضل، جون كان مهتم بالبوكر بس لأنه شايفها وسيلة لتطوير الرياضيات من الحياة الواقعية، لهيك احتاج نظرية عامة سماها نظرية الألعاب (Game theory) يلي فيك تطبقها وتستخدمها بالسياسة، الحرب، الحب أو حتى بمجال البزنس.
جون قرّب من تحقيق هدفه لما تعاون مع الاقتصادي (Oskar Morgenstern) وكتبوا كتباب (نظرية الألعاب والسلوكات الاقتصادية) بعام 1944.
بالكتاب شرحوا أنه أي حدث أو موقف اقتصادي يمكن تعريفه على أنه ناتج لعبة بين لاعبين أو أكثر.
طيب شو تعريف اللعبة حسب النظرية؟ اللعبة هيي يلي بتتكون من 3 عناصر، اللاعبين، الخطط(الاستراتيجيات)، المكافآت.
اللاعبون: لازم يكون عندن علم بقواعد اللعبة، الخطط والمكافآت.
الخطط: هي الأفعال يلي بيتخذوها اللاعبين باللعبة، الخطط هيي جوهر نظرية الألعاب. هي تفاعل استراتيجي بين لاعبين منطقيين وعقلانيين بحيث كل طرف بيتخذ قرارات حسب شو الطرف التاني ممكن يعمل.
المكافآت: هي أي ربح بنهاية اللعبة، ممكن يكون مصاري أو ترفّع بمنصب أو ربح سيارة أو أي شي.
الآن رح نطبق هالحكي ونشوف شو يعني نظرية الألعاب على مثال. ركزوا منيح وعيدوا قراءة قواعد اللعبة لحتى تحفظوها وتنفهم.
عندك سجينين جاك وتوم يلي انكمشوا بتهمة سطو بنك. ولكن الشرطة ما عندن أدلة كافية لحتى يلبسوهن التهمة. حطوا جاك وتوم بغرف متفرقة ورح يستجوبوهن.
الاحتمالات والقواعد:
1-إذا جاك وتوم اعترفوا، التنين رح ينحبسوا 10 سنين.
2-إذا واحد اعترف وواحد لا، يلي اعترف رح يطلع براءة ويلي ما اعترف رح ينسجن 20 سنة.
3-إذا التنين سكتوا وما اعترفوا كل واحد منهن رح ينسجن 5 سنين.
هدفنا هو تحليل اللعبة وكل لاعب شو لازم يختار لحتى ياخد أقل حكم.
قبل ما نبلش بدنا نتعرف عشي اسمو Dominant strategy، الاستراتيجية أو الخطة المهيمنة أو الأفضل، رح نسميها بالمنشور الخطة الأفضل.
الخطة الأفضل هيي الخطة يلي اذا اخترتا بغض النظر شو اختار خصمك فهي أفضل الك وبتعطيك أفضل نتائج.
الحل:
اللاعبان: جاك وتوم
الخطط(الاستراتيجيات): الاعتراف أو عدم الاعتراف.
المكافآت(النتائج): إطلاق سراح، 5 سنين سجن، 10 سنين سجن، 20 سنة سجن.

المشكلة باللعبة أنه كل لاعب ما بيعرف شو ممكن يختار خصمه لأنن بغرفتين منفصلتين والتنين ما بيطلعوا من الغرف لحتى يعترفوا أو ما يعترفوا.

لحل هيك مشكلة كل لاعب لازم يختار الخطة الأفضل اله.
من منظور توم:
توم ما بيعرف اذا جاك رح يعترف أو لا خلينا ناخد كل الاحتمالات:
1-إذا جاك اعترف وتوم لا: توم رح ينحبس 20 سنة.
2- إذا جاك وتوم اعترفوا رح ينحبس توم 10 سنين.
3-إذا جاك ما اعترف وتوم اعترف، توم رح يُطلق سراحه.
الآن بالنسبة لتوم أفضل خطة أو استراتيجية أنه يعترف شو ما اختار خصمه جاك، لأنه اذا اعترف في عندو احتمالين يا يطلع براءة يا ينحبس وقت أقل.

من منظور جاك:
كمان هو بنفس الموقف وبنفس الحالة وبنفس الاحتمالات.
لهيك برضو جاك رح يعترف لأن هي أحسن استراتيجة الو.

معناها اذا كل شخص اختار الخطة الأفضل الو وهيي انو يعترف معناها رح ينسجنوا 10 سنة كل واحد منن.
طيب فورا بيخطرلك ليش التنين ما اعترفوا؟ مو أحسن أنن ينسجنوا 5 سنين كل واحد بدل 10؟
هي الطريقة فقط بتشتغل إذا كان كل واحد منهن متأكد مية بالمية أنه التاني ما رح يعترف. وبالنسبة النا الأمر مجهول إذا توم وجاك رح يتعاونوا لهدرجة ويتفاهموا. بالإضافة أنه التنين ما رح يختاروا عدم الاعتراف لأنه وقتا رح يكون وقت السجن أطول من لو أنن اعترفوا. وأخيرا الاعتراف بيعطي كل واحد منهن احتمال أنن ما يقضوا وقت بالسجن أبدا.

نظرية الألعاب الها تطبيقات بالحرب وكان في الها مثال عأرض الواقع فيك تبحث عنها ب TED.
نظرية الألعاب واسعة جدا ونحنا ما حكينا عنها شي، فيك تعمل فيها كورسات وأبحاث إن كنت مهتم.

وكما عودناكم الخلاصة، إن كنت صاحب متجر أو مدرس أو حتى طالب شو ما كنت. فكر بذكاء ومنطق واختر خططك يلي بتخليك ناجح على أقرانك