توب 10 العاب نجاحها بقى لعنة

لما النجاح يبقى لعنة 

في عالم الألعاب، الجديد بقى عملة نادرة. زي قصص مبتكرة؟ شخصيات مختلفة؟ ميكانيكيات لعب غريبة؟ بقى قليل جدًا. والسبب إن كل لعبة دلوقتي تكلف ملايين وسنين من التطوير، فالمخاطرة بقت صعبة. طيب ليه يغامروا بشيء جديد لو عندهم وصفة مضمونة للنجاح؟

النتيجة : انو الاستوديوهات بتمسك اللعبة الناجحة وما تسيبهاش غير لما تعصرها للآخر. مش مجرد جزء تاني وخلاص، لكن كمان: ريميك، ريماستر، بورت لي اجهزه تانيه ، توسعات، مسلسلات، أفلام، وحتى ألعاب كروت! واللي في الأول بيبسط الجمهور… بس مع التكرار، بييجي وقت  الموضوع بيقى ممل و مكرر و انو الموضوع بقى هدفو فلوسك مش متعتك

تعالوا نشوف 10 ألعاب اتعصروا لدرجة إنك ممكن تلعب نفس القصة 5 مرات بأشكال مختلفة 

10- The Last of Us

قبل ما تنزل، قصص الزومبي كانت في كل حتة، بس ولا واحدة عملت اللي عملته The Last of Us. القصة عن رجل اسمو "جول" اللي خسر بنته في بداية الوباء، وبعدها اضطر ينقل بنت صغيرة اسمها "إيلي" عندها مناعة من الوباء. الرحلة دي مش بس عن الزومبي، دي عن بشر بيلاقوا معنى جديد للعيلة وسط الخراب.

اللعبة دي بقت أسطورة: نزلت على PS3، وبعدها نسخة محسنة للـ PS4، وبعدها ريميك كامل للـ PS5، غير الكوميكس، الألعاب الجانبية، والاقتباس الضخم لمسلسل HBO. باختصار: اسمها The Last of Us بس شكلنا عمرنا ما هنشوف الآخر .

9- Skyrim

يا سلام على "سكاي ريم". لعبة خلت كل واحد فينا يعيش عالم فبه التنانين و اللعبه بتديك الحريه الكامله انك تعمل أي حاجة، من إنقاذ العالم لسرقة معالق من بيوت القرى. العالم المفتوح الحر كان إدمان لدرجة إن اللعبة فضلت عايشة أكتر من 10 سنين.

موجودة. نسخة محسنة؟ أكيد. نسخة VR و طبعًا. نسخة (الذكرى العاشرة) و متنساش نزلت على كل الاجهزه من بدايه الجيل السابع لحد الجيل التاسع.

 

8- The Witcher 3

جيرالت صائد الوحوش الكئيب بقى حبيب الملايين مع الجزء التالت. القصة عن بحثه عن "سيري" بنته بالتبني، بس الحقيقة إن الناس وقعت في غرام العالم، التفاصيل، والمهام الجانبية اللي أوقات كانت أمتع من القصة الرئيسية.

النجاح كان ضخم لدرجة إن اللعبة خدت إضافتين كبار كأنهم ألعاب جديدة. بعدين نسخة "كاملة"، بعدين نسخة "عام اللعبة"، بعدين نسخة "الجيل الجديد". غير مسلسل نتفلكس اللي رجّع الاهتمام تاني. حتى لعبة الكروت "جوانت" بقت لعبة مستقلة. يعني من الآخر: اللعبة اتوسعت أكتر من شعر جيرالت الأبيض.

7- Final Fantasy VII

كل جزء في فاينال فانتسي بيكون قصة جديدة… إلا الجزء السابع. القصة عن "كلاود" والفرقة اللي بتحاول تنقذ الكوكب من شركة "شينرا" الشريرة و"سيفيروث" الشرير الأيقوني.

من بعد نجاحه، الدنيا اتفتحت: ألعاب فرعية (Crisis Core, Dirge of Cerberus)، فيلم (Advent Children)، ظهور في Kingdom Hearts. ولسه: ريميك ضخم متقسم على 3 أجزاء. اللعبة اتحلبت لدرجة إن "شينرا" نفسها كانت هتغير نشاطها وتبقى مطور ألعاب.

6- Dragon Ball Xenoverse 2

اللعبة اللي خلت كل فان لـ Dragon Ball يحقق حلمه ويشارك في أحداث السلسلة بنفسه. تعمل شخصيتك، تختار أسلوبك، وتشارك في المعارك الكلاسيكية.

اللعبة عاشت أكتر من 10 سنين بتحديثات وDLC مستمر، وكأنها بتكبر مع الأنمي. مع كل موسم جديد من Dragon Ball Super يضيفوا محتوى جديد. غير المودز اللي حوّلوها لموسوعة دراجون بول.

5- Resident Evil

الجزء الأول كان بسيط: فرقة خاصة محاصَرة في قصر مليان زومبي. جو رعب، ألغاز، ذخيرة قليلة. التجربة دي فضلت في دماغ اللاعبين.

بس من يومها، اللعبة دي اتكررت أكتر من كابوس. نسخ محسنة، Director’s Cut، Dual Shock Version، ريميك على GameCube، نسخة DS، وأفلام هوليوود. يعني حتى لو عايز تنساها، اللعبة نفسها مش هتسيبك.

4- Persona 3

سلسلة Persona مشهورة بالإصدارات المختلفة، لكن الجزء التالت كسر كل الأرقام. القصة عن طلبة بيعيشوا حياتهم النهارية عادي، وبالليل بيحاربوا وحوش مظلمة.

نزلت نسخة موسعة (FES)، نسخة محمولة (Portable)، وأخيرًا ريميك كامل (Reload). اللعبة دي اتكررت لدرجة إن الطلبة دول المفروض يكونوا خلصوا جامعة وخلفوا دلوقتي.

3- Half-Life

واحدة من أهم ألعاب الشوتر في التاريخ. "جوردون فريمان" بيحاول يهرب من منشأة غزتها كائنات فضائية، واللعبة اعتمدت على استكشاف ومفاجآت من غير ما تمسك إيدك.

وبعدها: توسعات (Opposing Force, Blue Shift), بورتات، ريميك كامل اسمه Black Mesa. غير إن موداتها زي Counter-Strike بقت ألعاب مستقلة كسرت الدنيا. اللعبة فعلاً كان ليها "نص عمر" أطول من اللي اتخطط له.

2- GTA V

اللعبة اللي بقت أيقونة للجيل كله. 3 أبطال مختلفين، سرقات ضخمة، وعالم لوس سانتوس اللي فيه كل حاجة تتخيلها.

بس المشكلة إن روكستار مسكت فيها جامد: نسخة على PS3 وXbox 360، بعدين نسخة محسنة، بعدين نسخة الجيل الجديد. والأونلاين فضل مصدر فلوس لمدة 10 سنين. كأن اللعبة نفسها بقت أكبر عملية سرقة في التاريخ.

1- Pokémon Red & Blue

كل حاجة في سلسلة بوكيمون بدأت هنا. اجمع فريق، اهزم الجيم ليدرز، وابقَ بطل الدوري. البساطة اللي خلتها خالدة.

بس الاستغلال كان مجنون: نسخة Yellow، رجوع منطقة كانتو في Gold/Silver، ريميك FireRed & LeafGreen، وبعدها Let’s Go Pikachu/Eevee. يعني اللعبة دي لعبناها بطرق أكتر من عدد البوكيمونات نفسها.
كاتب المقاله:اياد وائل 
شكرا للقرائه