النت مش بس سوشيال... إزاي حولت الفرجة لفلوس؟
“كل مشاهدة = فرصة”
لما بنفكر في الإنترنت، أول حاجة بتيجي في بال أغلب الناس هي الترفيه: فيسبوك، يوتيوب، إنستجرام، وتيك توك. ساعات بتعدي علينا وإحنا بنعمل "سِكروول" بدون هدف، بنضحك، بنتسلّى... وبننسى إن نفس الشاشة دي ممكن تكون مصدر دخل ثابت.
أنا واحد من الناس اللي كانوا بيشوفوا الإنترنت مجرد وسيلة تضييع وقت. كنت بقضي ساعات أتفرج على محتوى، أتابع ترندات، وأتفرج على ناس بتتكلم عن "الربح من الإنترنت" كأنه عالم موازي. الموضوع كان دايمًا بيتهيألي إنه محتاج خبرة، رأس مال، أو حتى واسطة.
لكن الحقيقة مختلفة تمامًا.
- البداية: الفرصة وسط الزحمة
بدأت ألاحظ إن في ناس عادية جدًا بتحقق دخل شهري من الإنترنت، مش من لا شيء، لكن من حاجات بسيطة بيعملوها بذكاء. قررت أدوّر بتركيز، مش على "الثراء السريع"، لكن على طريقة أبدأ بيها وأنا لسه مبتدئ. المهم إنها تكون حقيقية، وممكن تتنفذ.
لقيت قدامي طرق كتير ممكن أي حد يبدأ بيها:
- الكتابة: لو عندك أسلوب كويس أو حتى بس تعرف توصل فكرة، في مواقع ومجتمعات بتطلب محتوى مقابل فلوس.
- الخدمات المصغّرة: منصات زي خمسات وفايفر بتسمحلك تبيع مهارات بسيطة، زي تصميم، تفريغ صوتي، أو حتى إدخال بيانات.
- الترجمة: حتى لو مستواك متوسط في الإنجليزي، في شغل متاح.
- إنشاء محتوى: من غير كاميرا احترافية، حتى فيديوهات بسيطة فيها معلومة أو تجربة شخصية ليها جمهور.
أنا اخترت أبدأ بالكتابة، لأن ده اللي كان مناسب ليا وقتها. بدأت بمقالات بسيطة، في مجالات أعرف أتكلم عنها، وبعد شوية مجهود حقيقي، جالي أول عميل. أول مبلغ كان صغير، لكن الإحساس إن النت بقى مصدر دخل كان مختلف تمامًا.
اللي بيفرق فعلًا
مش شرط تكون خبير تقني، ولا تبقى شاطر في التسويق. السر في إنك تبدأ وتلتزم. معظم الناس بتقعد تستنى اللحظة المثالية، بس الحقيقة إن مفيش لحظة مثالية. البداية البسيطة دي هي اللي بتفتحلك أبواب كتير.
كمان، لازم تفهم إن الإنترنت مش طريق سهل، لكن بيدي فرص حقيقية. كل ما تشتغل على نفسك، وتطور مهاراتك حتى لو وحدة بس، هتلاقي فرص بدأت تظهر من أماكن ماكنتش متخيلها.
- خلاصة التجربه
الوقت اللي كنت بضيّعه في الفرجة، بقى بيتحول لفلوس. مش بأحلم ولا ببالغ، لكن حقيقي لما تبدأ تفكر في النت كأداة مش بس وسيلة تسلية، كل حاجة بتتغير. مش لازم تبقى مليونير علشان تقول "أنا كسبت"، مجرد إنك تحوّل وقت فراغك لدخل، دي خطوة كبيرة في اتجاه مختلف.
ولو وصلت لحد هنا، فاسمحلي أقولك: جرب. خطوة واحدة ممكن تفتحلك باب جديد، ويمكن كمان تكتشف إنك عندك كذا مهاره ممكن تستخدمها في عمل فلوس ، ويمكن كمان تكتشف إنك كنت واقف على كنز من زمان، بس مش شايفه.
