ازاي تتعلم و تحترف التسويق الالكتروني وتكسب فلوسك بلدولار؟!

الحكاية وما فيها باختصار :

- علشان تبتدي شغلة الميديا باير لازم تجهز نفسك انك تنمي مهارتك في مستويين :

 ال Strategic Level 
 ال Techniques Level  

- كل مستوى بتمر فيه ب ٣ مراحل :

 مرحلة جمع المعلومات 
 مرحلة تطبيق المعلومات وتحويلها لخبرة 
 مرحلة زيادة الخبرات ومشاركتها

- في المحتوى ده هكلمك عن ال Strategic Level أو المستوى الاستراتيجي اللي لازم تتعلمه علشان تتقن شغلة الميديا باينج.

- المستوى الاستراتيجي ده انا بعبر عنه أنه أساسيات الميديا باينج واللي مكون من  مجموعة من التخصصات وهي :

1- الإطار العام لقياس التسويق - Measurement Marketing framework .
2- قمع التسويق -  Marketing Funnel.  
3- رحلة العميل -Customer Journey.
4- كتابة نسخ  الاعلان - Copywriting 
5- اختبار التقسيم  - A/B Testing

أولا -  الإطار العام لقياس التسويق - Measurement Marketing framework  :

- شغلة الميديا باير بشكل عام مرتبطة بشكل كبير بتحقيق اهداف البزنس وعلشان تقدر تحدد انت قدرت تحقق الهدف المطلوب منك ولا لأ لازم تكتسب مهارة القياس واللي من خلالها هتقدر تحدد مدى فاعلية حملاتك الاعلانية على تحقيق اهدافها.

- الحل المثالي لجزئية القياس بالنسبالي هو عمل اطار واضح لخطة القياس في حملاتك الاعلانية واللي بيكون بالشكل ده :

خطوة البلان
خطوة التجهيز
خطوة الإطلاق

- طبعا الخطوات دي بتكون مختلفة من بزنس للتاني ولكن انا هكلمك عن كل خطوة بشكل عام يلا نبدأ :

خطوة البلان :

ودي بتتقسم ل ٣ مراحل :

مرحلة تحديد الهدف :

- ان العميل  يشتري من الموقع اللي بتشتغل عليه و علشان ده يحصل لازم العميل يوصل لاخر صفحه في رحلة الشراء، كده انت حددت الهدف اللي عايز العميل يوصل ليه وهوه صفحة ال Thank You Page.

مرحلة تحديد  طريقة الوصول للهدف :

- علشان العميل يوصل لصفحة ال Thank You Page فيه خطوات بيعدي عليها 
الاول انا لازم اكتشفها من الموقع اللي بشتغل عليه وغالبا الخطوات دي بتكون صفحة المنتج وبعد كده صفحة اتمام الطلب.

- يبقي طريقة الوصول للهدف منقسمة ل ٣ خطوات  اليوزر بيدخل على صفحة المنتج وبعد كده يدخل على صفحة اتمام الطلب وبعد كده يوصل لصفحة ال .Thank You Page    

مرحلة القرارات :

- هنا انت بتبدا تحط افتراضات  لو الهدف اتحقق هتعمل ايه ولو الهدف متحققش هتعمل ايه.

بمعني لو ١٠٠ مستخدم دخل صفحة المنتج ١٠ منهم وصلوا لخطوة اتمام الطلب و ٣ منهم وصلوا لصفحة  ال Thank You Page  يعني كده فيه ١٠٪ وصلوا لصفحة اتمام الطلب و ٣ ٪ اشتروا المنتج  بافتراض ان ده المتوسط الطبيعي لأداء الحملات الإعلانية.

- تعالى نتكلم  لو الاداء ده اتغير سواء بالنقص أو الإيجاب :

- هتعمل ايه لو لقيت ان ٤٪ وصلوا لصفحة اتمام الطلب و ١٪ فقط اشترى المنتج ده هنا افتراض محتاج تحط ليه اكشن بلان لو حصل  زي انك  تغير محتوى صفحة المنتج.

- الافتراض الثاني انك لقيت ان ٢٠٪ وصلوا لصفحة اتمام الطلب و ٧ ٪ اشتروا المنتج ده هنا افتراض محتاج تحط ليه اكشن بلان لو حصل زي انك تزود نسبة زورا الموقع علشان تزود عدد المبيعات.

كده احنا خلصنا اول خطوة وهي التخطيط

الخطوة الثانية التجهيز واللي بتنقسم الى :

خطوة تحديد وتنفيذ  طريقة تجميع البيانات من الموقع:

- هدف الخطوة دي هي  تجميع بيانات سلوك المستخدم من الموقع وايه الخطوات اللي يعملها داخل الموقع خطوة تجميع البيانات دي بتتم بادوات زي جوجل تاج مانجر او  بلاجنز او الانتيجريشن اللي بتقدمه المنصات .

خطوة تحديد وتنفيذ  طريقة تجميع البيانات من الحملات الإعلانية :

- هدف الخطوة دي هي عمل  كود خاص لكل حملة إعلانية علشان تقدر تقيس نتائج كل حملة وأدائها بشكل منفصل وده بيتم عن طريق ال UTM Builder  

خطوة إعداد وتجهيز تقارير تحليل البيانات :

- هدف الخطوة دي هي تحديد التقارير اللي هتجمع بياناتها من الخطوتين اللي قبل كده وهنا انت بتحدد ايه التقارير اللي محتاج تشوفها علشان بناء على التقارير دي هتاخد قرارات مهمه لتحسين حملاتك الاعلانية، جوجل اناليتكس هي محور الخطوة دي لاغلب البزنسس.

خطوة الإطلاق :

- ودي باختصار بيتم فيها قراية البيانات من جوجل اناليتكس او المنصة الاعلانية ومقارنتها بالارقام المستهدفة اللي حددتها في خطوة البلان وبعد كده بتبدا تعمل التحسين على أداء  حملاتك الاعلانية.

ثانيا  - قمع التسويق -  Marketing Funnel:

- لو جيت سالت انهارده 10 بيشتغلوا ميديا باينج يعني ايه Marketing Funnel  هتلاقي  كل واحد فيهم بيجاوبك اجابة مختلفة!  

علشان كده باختصار تعريفها هو :

مجموعة من الخطوات اللي بتوجه بيها المستخدم انه ياخد اكشن في اتجاه رحلة الشراء اللي انت محددها كميديا باير.

بشكل أساسي الماركتينج فانل بتساعدك تقيس وتبني استراتيجيات بتساعدك انك تجذب انتباه العميل وتخليه يتفاعل معاك واخيرا يشتري منك المنتج اللي بتبيعه.

الحقيقة فيه مفاهيم ومصطلحات كتير اوي بتشرح الجزئية دي انا لقيت ان اسهل مفهوم يساعدني هوه المفهوم ده :

Top of the funnel (TOFU): awareness-

Middle of the funnel (MOFU): consideration-

Bottom of the funnel (BOFU): conversion-

هبقى بضحك عليك لو قولتلك اني اقدر اختصرلك  في كام سطر مدى أهميتها في شغل الميديا باينج لكن اللي اقدر اساعدك بيه هوه اني وفرتلك طريقين تفهم بيها كل حاجه ليها علاقة بالفانل هكلمك عليهم في اخر المقال.

ثالثا -  رحلة العميل -Customer Journey :

- المرحلة دي انت محتاج تفهمها فقط لان تنفيذ أنشطتها مش مسؤوليتك انت لوحدك دي مسؤولية اقسام كتير في البزنس.

وباختصار رحلة العميل هي المغامرة اللي بياخدها العميل من اول ما بيتعرف عليك لحد لما يعملك دعاية بنفسه والرحلة دي بتعدي بمراحل زي :

بيتعرف عليك من خلال اعلان او اي نشاط تسويقي لحد لما يتفاعل معاك ويبدا يظهر اهتمامه بمنتجاتك وبعد كده بيتحول انه يبقى شخص مهتم جدا بالحصول على منتجاتك وجاهز للشراء.

وبعد كده يشتري منك وبعد كده يتنقل على مرحلة الانبساط او التعبير عن انه انبسط بالمنتج اللي اشتراه منك وطريقة معاملتك ليه والاهتمام بيه  واللي بتشجعه انه ممكن يشتري منك تاني.

وبعد كده يعمل ريفيو ليك وعلى قد ايه انت بائع كويس جدا وبعد كده يبدا بشكل ما يروج ليك بين اصدقائه والقريبين منه

ده باختصار رحلة العميل اللي محتاج تعرف كل خطوة فيها.

رابعا -  ال Conversion Copywriting

- من المهارات اللي لو ضيفتها علي ال Toolbox بتاعك كميديا باير هتفرق معاك كتير جدا في أدائك.

 و ال Conversion Copywriting  هي طريقة كتابة بتحفز المستخدم اللي انت بتستهدفه في حملاتك انه ياخد الاكشنز اللي انت عايزها سواء انه يضغط على لينك او يتفاعل مع اعلانك او يبعتلك رساله.

خطوات  ال Conversion Copywriting بتنقسم ل ٣ خطوات وهي :

مرحلة البحث والاستكشاف 
مرحلة الكتابة وعمل التيمبلتس وتعديلها 
مرحلة التجربة

- انا وفرت ليك كورس عن  الـ Conversion Copywriting للمستوى المبتدئ علشان تبدا تنمي مهارتك في الجزء ده بشكل سريع هكلمك عنه في آخر المحتوي.

5- اختبار التقسيم  - A/B Testing

- الخطوة دي انا حرفيا بمشي عليها في كل حاجه بشتغلها في حياتي تعريفها كالتالي :

هي مجموعة من التجارب بيتم فيها  مقارنة متغيرين أو أكثر ببعض  (A و B) وهدفها هو تحديد المتغير الاكثر فاعلية.

لو جيت طبقت ده على الميديا باينج هتلاقي انك بتحتاج تقارن متغيرات كتير ببعض زي أداء  نوع استهداف مع نوع استهداف تاني أو أداء Ad Copy مع Ad Copy تانية  وهكذا

كده انا اعتبر خلصت شرح المحتوى ودلوقتي افتراضا ان المحتوى ده عجبك وخلاك تتحمس انك تعرف اكتر عن الاساسيات دي وعايز تزود معرفتك بيها تعمل ايه ؟

انا وفرت ليك جوجل شيت فيه المصادر دي :

1- اهم مصدر عن Measurement Marketing framework.

2-  مصدرين عن ال  Marketing Funnel مصدر مختصر في مقال ومصدر تاني جزء من كتاب لو عايز تزود معرفتك اكتر عن الفانلز.

3- مصدر عن ال Customer Journey

4- كورس عن  الـ Conversion Copywriting 101

5-  مصدر عن A/B Testing From Zero to Hero