ليه الألعاب مش مجرد تضييع وقت؟ نظرة مختلفة على عالم الجيمز.
كتير من الناس لحد النهارده شايفة إن الألعاب الإلكترونية مجرد وسيلة لتضييع الوقت. بس الحقيقة إن عالم الجيمز تطور جدًا وبقى له دور مهم في حياة الملايين حول العالم ،خصوصًا الشباب.
أول حاجة، الألعاب بتساعد على تطوير المهارات العقلية زي التركيز، سرعة اتخاذ القرار، وحل المشكلات. ألعاب زي الشطرنج أونلاين، أو الألعاب الاستراتيجية زي "Clash of Clans" و "League of Legends" بتخليك تفكر وتخطط قبل ما تتحرك.
كمان، الألعاب بقت وسيلة ممتازة لـ التواصل الاجتماعي. ناس كتير بقت تتعرف على بعض من خلال ألعاب زي "PUBG" و"Fortnite"،و"Call Of Duty" وبيكوّنوا صداقات حقيقية بتكمل بره اللعبة.
الألعاب كمان بقت مصدر دخل حقيقي. في ناس بتكسب آلاف الجنيهات شهريًا في ناس بقت تعتمد على الألعاب كمصدر دخل ثابت، سواء من البث المباشر (Streaming) على فيسبوك أو يوتيوب، أو من خلال المشاركة في البطولات، أو حتى بيع حسابات وأدوات داخل اللعبة.
بجانب ده، في ألعاب تعليمية بتعلم الأطفال والكبار مهارات زي البرمجة، التفكير النقدي، أو حتى اللغات الأجنبية.
ومن ضمن أنواع الألعاب اللي ليها فايدة كبيرة كمان هي الألعاب الدينية، واللي بتساعد الأطفال والكبار على تعلم القرآن، والسيرة النبوية، والأدعية، بشكل مبسط وممتع. زي ألعاب "تعلم الوضوء"، و"أسئلة دينية"، أو "تحدي القرآن الكريم" المنتشرة على الموبايلات.
كمان في نوع تاني مفيد جدًا للأطفال وهو الألعاب التفاعلية، اللي بتساعدهم على تنمية مهارات التفكير والإبداع من خلال الرسم، التلوين، حل الألغاز، أو التجارب العلمية البسيطة زي اللي في تطبيقات "Toca Boca" و"Thinkrolls".
يعني اللعب مش بس متعة، ده كمان وسيلة للتعلم والتطور.
ومن الحاجات اللي بقت تنتشر كمان مؤخرًا هي الألعاب البرمجية، اللي بتعلم الأطفال والمبتدئين أساسيات البرمجة بشكل ممتع وتفاعلي، زي لعبة “Scratch” أو“CodeCombat”.
لكن برغم كل الفوايد دي، لازم نستخدم الألعاب بشكل متوازن. اللعب لفترات طويلة من غير تنظيم ممكن يضرك أكتر ما يفيدك. الحل هو تنظيم وقتك، واستغلال الجيمز كأداة مفيدة مش مضيعة للوقت.
في النهاية، الألعاب مش تضييع وقت… هي وسيلة للتعلم، التسلية، والتطور الشخصي. الفرق الوحيد هو "إزاي بتستخدمها".
