أسرار مطبخ المحتوي: ج٤ عن كتابة المحتوي من الصفر إلي الإحتراف
🔸 إزاي تقدر تكتب POC
(Piece Of Content)?
- أي قطعة محتوي POC بتتكون من:
1) Headline عنوان
2) Introduction (Intro) مقدمة
3) Body جسم الموضوع
4) Summary ملخص
5) Call To Action (CTA) الفعل أو الإجراء اللي هتطلب من الجمهور إنهم يعملوه بعد ما يقرأوا قطعة المحتوي.
🟠 ملحوظة:
- في أنواع من المحتوي زي اللي بنكتبه للسوشيال ميديا، قطعة المحتوي بتاعته بتكون صغيرة، فأحياناً ممكن نستغني عن الـ Intro و بندخل في الـ Body علي طول.
- و ممكن المحتوي يكون صورة علي الإنستجرام، فبننزل الصورة و بنكتب تحتها الـ Caption و بس.
- و ساعات بنستغني عن ال Summary لو قطعة المحتوي اللي بنكتبها صغيرة و مش محتاجة لملخص و بندخل ع الـ (CTA) علي طول.
و هنشرح كل جزء من مكونات قطعة المحتوي بالتفصيل.
🔸 الـ Headline - العنوان.
- ازاي تكتب عنوان يخلي جمهورك يقرأ المحتوي بتاعك؟
العنوان هو أول حاجة بيشوفها الجمهور في قطعة المحتوي، و هو اللي بيخلي الجمهور يكمل قراءة أو يكمل Scroll و يعدي البوست بتاعك.
طيب تعمل إيه عشان تخلي جمهورك يتشد للعنوان فيكمل قراءة المحتوي بتاعك؟
١) تخلي شكل العنوان ملفت بشكل يجذب إنتباه الجمهور زي إنك تغير كلمة بكلمة تانية في عبارات مشهورة زي مثلاً:
لو بتتكلم عن القهوة يبقي 👇
الحب من أول نظرة ⬅️ الحب من أول رشفة.
٢) استخدم عناوين فيها أرقام خصوصاً الفردية زي مثلاً:
٥ طرق للحفاظ علي البشرة من الجفاف.
الأرقام بتشجع الجمهور علي القراءة لإنه بيبقي عارف إن البوست محدد مش هياخد وقت.
٣) عنوان فيه إحصائية زي:
٨٥.٦٠ ٪ من الجمهور كملوا قراءة المحتوي الخاص بيا، بعد ما شدهم العنوان بتاعه.
٤) العناوين المرتبطة بالـ Trends، و استخدم للتريندات صح زي ما اتفقنا قبل كدة عشان لو موظفتش التريند صح في المحتوي اللي بتكتبه، يبقي بلاش منه أحسن عشان هيجيب نتيجة عكسية.
٥) استخدم كلمة (أنت) عشان الناس بتحب تحس إنك بتكلمها هي بالتحديد.
٦) في كلمات بتجذب الجمهور ممكن تستخدمها في عنوانك:
اقوي - أفضل - أحسن - أسهل - أسرع - أجمل - ماذا لو - خطوة بخطوة ....
زي مثلاً لو بتكتب عن منتج زي الدفايا، طبعاً هتربطه بفصل الشتا، فهتكتب مثلاً: أسرع حاجة تدفيك في التلج دا، و هيكون محتوي البوست عن مزايا الدفايا.
٧) استخدام تاريخ السنة في العنوان بيحسس الجمهور إن المكتوب هو أحدث حاجة في المجال اللي بتكتب عنه.
٨) العناوين اللي بتثير مشاعر عند الجمهور زي الخوف أو التعاطف، و العناوين اللي فيها أسرار و مفاجآت حصرية.
🔸 في النهاية عايز أقولك علي حاجة مهمة، و هي إنك لو كتبت العنوان بعد ما تخلص كتابة المحتوي كله، هتقدر تطلع أحسن عنوان، لإن ساعتها هيكون المحتوي كله باين قصادك، فبالتالي هتحس إن العنوان اللي كتبته في الآخر هو أكتر عنوان بيعبر عن المحتوي، و لو كتبته في الأول هيقيدك و يحد من تفكيرك في المحتوي، و هيخليك تفكر في إتجاه واحد، و انت كنت ممكن تكتب أحسن من كدة لو مش حاصر تفكيرك في عنوان محدد.
برضه حاول تكتب أكتر من عنوان عشان دايماً أول عنوان بييجي ف بالك، مش بيكون أفضل حاجة و تقدر تكتب عنوان أفضل منه.
🔸 الـ Intro:
- ازاي تكتب Intro تخلي جمهورك يكمل قراءة الـ POC و بالتالي تخلي المحتوي Go Viral (ينتشر بسرعة)؟
- يعني إيه Introduction؟
الـ Intro يعني مقدمة، و في الـ Posts اللي بنكتبها للسوشيال ميديا بتكون عبارة عن جملة إفتتاحية بتبدأ بيها الـ Post بعد ما كتبت العنوان، هدفها شد الجمهور إنه يكمل قراءة الـ POC.
- طب ازاي أكتب Intro تشد الجمهور؟ 👇
١) تكلم جمهورك بطريقة مباشرة زي:
إيه أهمية الـ Content Writing في تسويق المنتج أو الخدمة؟.
٢) ربط المقدمة بالمناسبات و الأحداث الحالية، سواء الأعياد أو الأحداث اللي بتدور في البلد.
٣) تكتب مقدمة تخلي الجمهور يغير فكرته عن حاجة منتشرة أو حاجة هو متعود يعملها زي:
طبعاً مفيش أحلي من فنجان قهوة الصبح ع الريق تبدأ بيه يومك و تظبط مزاجك .. بس أنت عارف إن الموضوع دا غلط علي صحتك .... و تبدأ تكمل شرح الأسباب.
٤) تذكر إن في إحصائية بتقول كذا ...
٥) تبدأ بسؤال بيدور ٥ي دماغ جمهورك أو مشكلة بتواجهه زي:
بتعاني من تساقط شعرك و مش عارفة تعملي إيه؟
٦) تبدأ بموقف و حكاية قصيرة مرتبطة بالموضوع اللي بتكتب عنه.
٧) تبدأ بمقدمة تثير عند جمهورك مشاعر الخوف زي:
بقالك فترة بتعمل إعلانات و مش بتحقق نتيجة كويسة؟ ☹️
و بالشكل دا هتخسر جزء كبير من العملاء 😢
متخفش حلك عندنا ....
و بعدين تكمل
٨) تبدأ بمقدمة تقول فيها إنك عارف إنه استخدم المنتج أو الخدمة دي قبل كدة، و تجربته كانت سلبية، زي:
أنا عارف إنك جربت أكتر من شامبو للقضاء علي القشرة، و لسة برضة القشرة موجودة، لإنك مكنتش بتستعمل الشامبو الصح.
٩) تقول بشكل صريح إنه لما يقرأ الـ POC هيستفيد كذا و كذا.
١٠) المقدمة تكون شرح للعنوان علي طول لو كان العنوان سؤال.
١١) تقول للجمهور اللي ممكن يخسره لو مقرأش الـ POC.
🔸 أنا كدة قلتلك إزاي تكتب مقدمة بأكتر من طريقة، بس عايزك دايماً تغير طريقتك في كتابة Intro و تكون متنوع، و استخدم كل مرة طريقة تكون مناسبة مع فكرة الـ POC اللي بتكتبها، و خلي دايماً عندك طريقتك الخاصة في الكتابة.
زي ما قولنا في أول البوست إن الـ Intro عبارة عن جملة إفتتاحية، يعني متطولش فيها و وضح أنت هتتكلم عن إيه بسرعة.
و في الجزء الخامس بإذن الله هنستكمل باقي مكونات قطعة المحتوي فأنتظروا.
