هنتعلم مع بعض لعبة استيماشن بالتفصيل

لعبة الاستيمشن 

هات معايا الكوتشينة و تعالى بقى …… عدد اوراقها 52 ( من غير الجواكر ) و عدد اللعيبة بيبقى 4 يعنى لو وزعنا 52 ورقة دول على ال4 بقى كل واحد معاه 13 ورقة تمام معايا لحد هنا تعلى بقى نعرف الجيم بيمشى ازاى 

عندك 4 اشكال ( الوان ) فى الكوتشينة  سبيد ( القلب المقلوب ) و الهارت ( القلب العادى ) و كاروه ( السمبوكسة ) و الترفل ( الوردة ) كدا ده بالترتيب على حسب قوة اللون او الشكل قول ورايا ( سبيد هارت كاروه

 ترفل ) كل شكل من دول فيه 13 كارت تعالى نعرف ترتبهم برضه اعلى كارت ايس ( الواحد ) و بعده  الرواه (الشايب )و بعده الدامة ( البنت ) و بعده الجاك ( الولد ) و بعد كدا ترتيب الارقام من الكبير للصغير من ال 10 لل 2 

كل الكروت بتتوزع عشوائى على اللعيبة بيبدا كل لعيب بترتيب كروته كل لون لوحده بترتيب قوة الكرت نفسه يعنى مثلا كل كروت السبيد مع بعض من الكبير للصغير و كروت الهارت بعدها و كروت الترفل ( عشان بس متلخبطش بين الهارت و الكاروه ورا بعض لكن احنا عارفين ان الكاروه اقوى من الترفل )   بعدها و بعد كدا الكاروه 

ركز معايا بقى فى اللى جاى ….. نبدا نشوف بقى هنعمل استيماشن ازاى لعدد اللمات بتاعتنا … الاول اللمة اللى هى ايه ؟ اللمة بتتكون من اربع كروت كل لاعب بيلعب كارت فى اللفة و صاحب اكبر ( اقوى كارت ) بيبقى اللمة بتعته مثال ( الكروت اللى نزلت من كل لاعب هى 7 و 10 و جاك ( ولد ) و رواه ( شايب ) يبقى اللى نزل الرواه هو صاحب اعلى كارت ف اللمة تبقى بتعته ) 

ببدا بقى استيمات على اساس ده قوة الكروت اللى معايا و هقدر الم بيهم كاك لمة و من هنا بقى بيبدا المزاد على صاحب القطوع …. صاحب القطوع ده هو صاحب اكبر عدد من اللمات من حقة انه يقرر انهى لون من الاربعة هو القطوع ..اللى من خلال اللون ده اى حد بيلعب عايز ياخد اللمة اللى على الارض و مش معاه من نفس اللون الملعوب يقدر يقطع بيه و ياخد اللمة ( لو محدش عمل over cut عليه نزل قطوع اعلى يعنى )

 

 

احنا قلنا كل واحد هيبدا يقول هيجمع كام لمة … مينفعش يبقى مجموع اللمات اللى هيطبها اللعيبة تساوى ١٣ عشان لو كدا كله هيبقى كسبان فلازم تزيد او تقل عن ١٣ لو ازيد يبقى الجيم اوفر و لو اقل يبقى الجيم اندر 

 

ف دلوقتى لازم واحد على الاقل ميلمش اللمات اللى هو طلبها و لو كله ملمش اللى طلبه يبقى الجيم صعايدة 

الجيم او البولة ١٣ روند او دور و ٥ روندات بيبقى فيهم القطوع اجبارى متحدد بنبدا بالصنز. (… الجيم الصنز ده من غير قطوع خالص يعنى الكبير بيلم من غير محد يقطع عليه ) 

و بعد كدا جيم من كل شكل جيم سبيد و بعديه هارت و بعديه كاروه و بعديه ترفل يبقى اجمالى الروندات فى البولة ١٨ روند 

كل واحد بيلعب عشان يميد ( يكسب ) ف اكيد فيه طريقة حساب عشان نعرف الكنج و السب كنج و السب كوز و الكوز  

ف طريقة الحساب بسيطة جدا  فى طريقتين انك تنزل اى ابلكيشن فيه الحسابات estimation calculator و لو حابب تعرف الحسابات هقولك 

اللاعب اللى بيميد او بيكسب بيبقى مجموع اللمات اللى طلبها +١٠ لو طالب ٣ لمات مثلا يبقى كسب الروند ده ١٣ و اللي مبيميدش او بيخسر الروند بينقس عدد اللمات اللى طلبها يعنى لو طالب ٢ يبقى الروند ده هو ( -٢ ) 

ناقص كدا السوبر كول و ده بيبقى اللى طلب طالب ٨ لمات او اكترو ده لو كسبه ياخد ٦٤ و لو خسره ينقص ٣٢ و لو طالب ٩ يزيد ٨١ و ينقص ٤٠ يبقى من اول السوبر كول بيكسب الطلب فى نفسه و ينقص النص يعنى لو ١٠ لمات يزيد ١٠٠ و ينقص ٥٠ 

الداش كول و ده بيحاول انه ميلمش ولا لمة لو كسب بيزيد ٣٢ لو الجيم اندر و لو الجيم اوفر يزيد ٢٣ و ينقص العكس يعنى لو الجيم اوفر ينقص ٣٢ و لو الجيم اندر ينقص ٢٣

و ده شكل الجدول اللى بيتعمل عشان يساعد فى الحسابات .

لو اى استفسار عن اى معلومة انا موجود و عشان بقى تبقى برنس و لعيب لازم تتمرن لوحدك كدا و هتعرف بعدها ازاى تطلب و تميد و يبقى عندك ايستميت جامد نزل اى ابلكيشن على الموبيل للعبة و ابدا العب كدا و واحدة واحدة هتظبط 

كله فى الاول بيبقى مش عارف يتصور هيلم كام و كدا بس باللعب بتعرف و فى وقت قليل .

 

رقم الروند	اللاعب الاول	عدد اللمات	اللاعب التانى	عدد اللمات	اللاعب الثالث	عدد اللمات	اللاعب الرابع	عدد اللمات	الجيم اوفر ولا اندر
١	مجموع الروند الاول للاعب الاول	عدد اللمات الطلبها
٢	بنجمع الروند الاولانى على الروند التانى
٣