كاميرا مراقبة في ثواني ..السر وراء برنامج ألفريد Alfred
كاميرا مراقبة في ثواني ..السر وراء برنامج ألفريد Alfred
مقدمة
عمرك سافرت وكنت قلقان على البيت؟ أو سايب أولادك في البيت وعايز تتابعهم؟
كلنا تقريبًا عندنا موبايل قديم مرمي في الدرج أو على الرف ومش لاقيين له أي لازمة..
بدل ما تسيبه مركون أو تبيعه برخص التراب، تقدر تحوله لأداة مفيدة جدًا يبقى كاميرا مراقبة ذكية شغالة اليوم كله.
لازم تعرف ان موبايلك القديم مش للركنة.. حوله لكاميرا مراقبة ببلاش مع البرنامج ده:
التعريف بالبرنامج:
تطبيق مجاني بيحوّل أي موبايل قديم سواء كان أندرويد أو آيفون لكاميرا مراقبة أونلاين.
تقدر تراقب أولادك أو مكتبك أو أي مكان يخصك و كبار السن للاطمئنان عليهم من أي مكان في العالم.
فكرة البرنامج:
فكرة التطبيق ببساطة انك بتثبت التطبيق على الهاتف القديم وتخليه ثابت في مكان معين زي مدخل البيت أو غرفة المعيشة ، وبعدين تثبت نفس التطبيق على هاتفك الأساسي اللي هيبقى معاك في أي مكان. بعد كدة بتربط الجهازين ببعض من خلال نفس الحساب (الجيميل).وبكدة تقدر تتابع بث مباشر مستمر فيديو صوت وصورة وممكن تتكلم مع أي حد في مكان الجهز الثابت زي ما بتسمعه تماما.
كده تقدر تتابع البث المباشر من الكاميرا في أي وقت ومن أي مكان
يعني موبايل قديم = كاميرا مراقبة
مميزات البرنامج:
1 - بث مباشر تفتح الموبايل وتشوف بيتك، مكتبك أو أي مكان يخصك.
2 - إنذار بالحركة: لو حد عدى قدام الكاميرا، البرنامج هيبعتلك إشعار فورًا.
3 - تسجيل فيديو وصوت: يعني مش بس صورة، لأ كمان فيديو يتخزن تقدر تراجعه.
4 - دعم الصوت الثنائي في الاتجاهين: يعني تسمع وتتكلم من خلال الموبايل زي الكاميرات الاحترافية تماما.
5 - شغال ببلاش: النسخة المجانية كافية جدًا، وفي نسخة مدفوعة لو عايز مميزات زيادة.
6 - أهم ميزة:إنك مش محتاج أي معدات معقدة.. مجرد ستاند بسيط أو مكان تثبّت فيه الموبايل وخلاص، والنتيجة انك هتخلي أي موبايل قديم عندك يتحول لأداة مفيدة بدل ما تركنه ومتستخدموش، وهتحس إنك رجّعت للموبايل عمر جديد.
أهم استخداماته اليومية:
مراقبة الأطفال وتعرف تطمئن عليهم في كل وقت.
مراقبة كبار السن لو محتاجين رعاية.
مراقبة البيت أو الشقة وانت مسافر.
حل مؤقت ممتاز وفعال جدا لمراقبة مكتب أو محل صغير.
تثبيت البرنامج وتشغيله:
أولا : حمل التطبيق مجانا من متجر جوجل على الموبايلين، على الأول اللي هيتثبت في المكان وعلى التاني اللي هيبقى معاك ،وتعتبر النسخة المجانية كافية جدًا لمعظم الناس هتلاقي فيها البث المباشروالتنبيهات بالحركة وتسجيل الفيديو.
ثانيا : سجل دخول في التطبيق بنفس حساب جوجل(جيميل) أو أبل.
ثالثا: ثبّت الموبايل القديم في مكان مناسب ،على ستاند أو جنب الباب مثلاً.وبكده بقى عندك نظام مراقبة ممتاز من غير ما تشتري كاميرا جديدة وجهاز تسجيل للكاميرا.
رابعا وأخيرا: جرّب البرنامج ومش هتسيب أي موبايل قديم يتركن على الرف تاني.
ولنا لقاء آخر بإذن الله مع تطبيقات رائعة ومفيدة
ومتنسوش المتابعة علشان نشوف مع بعض كل جديد ورائع ومميز في عالم التقنية
