مهارة لو اتعلمتها هتزود الانتاجية وهتسهل عليك حياتك

مهارة لو اتعلمتها هتزود الانتاجية وهتسهل عليك حياتك

0 المراجعات

كنا قولنا من زمان إن من أهم المهارات اللي لازم تكون عندك (سواء في مجال البرمجيات أو غيرها) هي مهارة الحفركة، يعني أبحث وأدور وأتعب علشان أفهم الحاجة وأحل المشكلة اللي بتقابلني وأتعصر من مصادر كتير، قبل ما أسأل أي حد متخصص.
ودلوقتي في مقال سريع كده، حابب أعلمك مهارة مهمة متجزئة من الحفركة ألا وهي مهارة البحث في جوجل.
أيوه هي مهارة طبعًا وفيها فنيات كتير بتفرق، هعرفك أهمها في 8 نقاط:

1. لو عندك موقع عاجبك جدًا وحابب تبحث عن مواقع نفس فكرت، فأنت ببساطة بتستخدم كلمة related وأنت بتبحث في جوجل وتكتب عنوان الموقع، مثلًا أنا عاوز أجيب مواقع كورسات زي udemy فـ هكتب على جوجل الجملة الآتية:
related:udemy.com
هلاقي كل النتائج اللي طلعت مواقع كورسات زي Udacity و Linda وغيرهم.

2. لو حابب من جوجل تبحث عن معلومة جوا موقع معين وتطلع ليك نتائج مطابقة لبحثك، فأنت بتستخدم كلمة search وبعدها اسم الموقع وبعدين الحاجة اللي بتبحث عنها، يعني مثلًا حابب أبحث عن كورس Java في موقع Udacity فبكتب على جوجل الجملة الآتية:
search:udacity.com Java
فـ هلاقي كل الكورسات المتعلقة بلغة الجافا جوا موقع Udacity قدامي.

3. أما لو حابب تبحث عن معلومة معينة اتنشرت خلال فترة زمنية محددة فأنت بتستخدم ... ، يعني مثلًا لو حابب تشوف مقال أو أي معلومة عن المبرمجين اتنشرت في الحقبة الزمنية بين 1990 و 1999 فأنت ببساطة بتكتب في جوجل:
Developer 1990...1999

4. لو حابب وأنت بتبحث عن معلومة معينة تتجنب ظهور أي معلومة لنتيجة مشابهة فأنت بتستخدم في نهاية كلمات البحث علامة - وجنبها مباشرةً (بدون مسافات) الكلمة اللي بتحاول تتجنب ظهور نتائجها، وليكن مثلًا حابب تبحث عن حاجة في ال android وعندك هوس لما تسمع كلمة Flutter، فمش حابب أي نتيجة بحث تظهر عن Flutter فبتكتب الآتي:
Android Development -flutter

5. فيه مصطلح حابب تبحث عنه بس نسيت جزء فيه؟ سهلة، مكان الكلمة أو الجزء اللي نسيته ممكن تكتب *، يعني مثلًا سمعت عن البرمجة كائنية التوجه اللي هي بالإنجليزي حاجة oriented programming، فهتكتب في جوجل:
*oriented programming

6. النقطة رقم 5 عدت عليك وأنت ما تعرفش أساسًا إيه هي البرمجة كائنية التوجه وبعد ما عرفت إن الكلمة المفقودة في الأول كانت object فأنت حابب تعرف أكتر عنها يبقى ببساطة استخدم كلمة define هيجيب ليك كل النتائج اللي بتتكلم عن تعريف ال OOP، يعني هتكتب في جوجل:
define:object oriented programming
7. حابب تبحث عن جملة "بالنص"، يعني من الآخر جوجل ما يحورش عليك ويجيب ليك اللي أنت كاتبه بالظبط؟ سواء مقولة أو نتيجة بنفس العنوان؟ يبقى تخلي نتيجة البحث دي بين علامات تنصيص، ودي مش محتاجة مثال 👀

8. لو حابب تبحث عن موقع معين وبيقدم خدمة معينة، تقدر ببساطة تستخدم كلمة site، يعني مثلا حابب أشوف مواقع بتتكلم عن علم النفس، فهكتب في جوجل:
site: psychology

بس كده يا سيدي، دول 8 نصائح تساعدك تطلع من جوجل برحلة بحث ممتعة ومفيدة، وتوصل للنتيجة اللي حابب توصل ليها بشكل أسرع.
 

التعليقات ( 0 )
الرجاء تسجيل الدخول لتتمكن من التعليق
مقال بواسطة

articles

19

followers

9

followings

2

مقالات مشابة