إزاي تبقا فريلانسر ناجح؟! (العمل الحر)
ازاي تبقا فريلانسر؟!
(العمل الحر)
أولا يعني إي فريلانس؟!
فريلانس معناها بالعربي (العمل الحر) يعني تبقا حر نفسك في شغلك يعني تبقا مدير نفسك. إنت اللي تحدد مواعيد شغلك وتكون حر في طريقة تطويره. ومفيش شك إن الفريلانسنج أو العمل الحر هو طريقة فعالة للربح عن طريق الإنترنت ومناسبة جدا كمصدر دخل لكتير مننا في الوقت الحالي.
لحد هنا والدنيا حلوة وتمام. لكن لازم تاخد بالك من إن مش معنى إنك حر نفسك في الشغل إن الدنيا هتكون سهلة أوي زي ما في كتير بيتكلمو عن ده في وسائل التواصل الاجتماعي المختلفة.
لازم تعرف إنك لازم تبدأ صح وعلى أساس قوي عشان تبقا فريلانسر لإن الفريلانسنج مش مجال الفريلانسج هو (أسلوب شغل) وممكن تستخدمة في مجالات كتير جدا زي الكتابة والتدريس والدعاية والإعلان وغيره كتير.
ومعايا هتعرف ازاي تأسس نفسك صح من أول يوم: .....
في الوقت الحالي بقا في أعداد كبيرة جدا بيستخدمو أسلوب الفريلانسنج (العمل الحر) في شغلهم وده لأنه أسلوب مميز وعملي جدا وفيه مميزات م موجودة في أسلوب الشغل التقليدي فهنا هنسأل: ليه الناس بيتجهو للعمل الحر في الوقت الحالي؟!
والإجابة:-
- المرونة: عشان انت اللي بتتحكم في مواعيد الشغل ووقت التسليم وحتى انت اللي بتحدد مكانه هتقدر تشتغل من مكتبك أو من البيت أو حتى ع البحر انت اللي بتتحكم في نفسك.
- الدخل غير المحدد: فالدخل هنا مرتبط باجتهادك يعني مثلا هتقدر تشتغل كام ساعة في اليوم! فكل ما اجتهدت أكتر كل ما حققت دخل أكبر. وهنا لازم تدرب نفسك كويس جدا على الالتزام بأكتر من حاجة زي (مواعيد الشغل- مدة الشغل- معاد التسليم- إدارتك لشغلك وطريقة التعامل مع العملاء) ومهم جدا إنك تعرف ازاي تتواصل وتدير علاقتك مع العميل بشكل احترافي. وكده هتكون قدرت تكون مصدر دخل إضافي عن طريق الربح من الإنترنت.
وهنا لازم تعرف ازاي تبقا فريلانسر مميز ويبقا ليك العملاء بتوعك واللي بيقدرو قيمة شغلك كويس جدا.
المهارات الأساسية عند الفريلانسر الناجح:-
وهنا لازم نفرق بين أنواع المهارات المطلوبة فهنلاقي عندنا منها:-
- المهارات الخاصة بمجالك (HARD SKILLS) : بمعني انك لو بتشتغل في التصميم مثلا لازم تكون ملم كويس جدا بدراسته كعلم وبالأدوات اللي هتحتاجها في شغلك. أو مثلا لو هتشتغل في الكتابة لازم تكون مذاكر قواعد الSEO وطرق كتابة المحتوى.
- المهارات الناعمة (SOFT SKILLS): ودي هي المهارات اللي هتساعدك تبني علاقات كويسة وتعرض شغلك بشكل سليم وتديره باحترافية. يعني:-
- لازم تكون متعلم مهارات التواصل مع العميل عشان تقدر تتعامل معاه باحترافية.
- ولازم كمان تكون عارف ازاي تقدر تدير وقتك بمعنى إنك تكون ملتزم بأوقات الشغل اللي انت حددتها لنفسك وكمان تكون ملتزم بمواعيدك مع العميل بحيث انك تؤدي شغلك من غير تأخير وبأقل أخطاء ممكنة.
- وكمان عندك مهارة التفاوض بحيث تقدر تدير نقاشاتك مع العميل بعقل عشان بعد إنجاز المهمة المطلوبة منك تكون وصلت مع العميل لحالة الرضا من طريقة شغلك.
• وفي كمان بعض المهارات اللي لازم تحسن نفسك فيها زي مثلا:-
- تنظيم المبيعات والمصروفات.
- تنظيم الفواتير.
- إزاي تحسب ضرايبك.
- التسعير.
وفي كمان بعض الأدوات المهمة ليك عشان تبقا فريلانسر ناجح ودي هتساعدك في تنظيم وقتك ويومك بحيث تستغلهم بشكل مفيد وفعال
• أدوات مهمة لكل فريلانسر:-
• أدوات الإنتاجية والتنظيم زي trella, notion, monday.
• أدوات التواصل وإدارة العملاء زي .google work space, zoom
• أدوات خاصة بالأمور المالية زي paypal.
• أدوات البورتفوليو والبراندنج زي linked in, word press.
• إقتراحات لبعض منصات العمل الحر زي مستقل، خمسات.
وهنا عندنا بعض النقاط المهمة جدا لكل فريلانسر ناجح في مجال العمل الحر وهي:
• لازم تكون فاهم الخدمة اللي بتقدمها كويس جدا ومتمكن منها.
• اختار المنافس بتاعك بحيث تكون المنافسة على أساس جودة الخدمة وليس على أساس السعر.
• اعمل بورتفوليو قوي بحيث تختار أفضل المهمات اللي قمت بعملها وتنظمها في مكان واحد ومنظم عشان تسهل فرصة العميل على التعرف على شغلك ومدى جودته.
• احمي نفسك بمعنى إنك لازم تكون متأكد من إن المنصة اللي انتب تشغل عليها بتحمي حقوقك، وإنك تلجأ للتعامل مع الملاء بشكل رسمي زي التواصل عن طريق الإيميل أو البريد الإلكتروني الخاص بيك عشان تقدر تثبت شغلك.
وبكده أتمنى إني أكون قدرت أساعدك في توفير فرصة ليك للربح عن طريق الإنترنت وقدرت كمان أوضح معني الفريلانسينج أو العمل الحر وازاي تقدر تكون فريلانسر ناجح وعندك القدرة على اكتساب العميل وإدارة شغل بشكل احترافي جذاب.
