ليه أغلب الناس بتفشل في الربح من الإنترنت؟ وازاي تبدأ صح
فيه سؤال بيتكرر كل يوم تقريبا: "هو فعلاً في ربح من الإنترنت؟"، والإجابة ببساطة: "أيوه في، بس مش لكل الناس". الحقيقة إن أكتر من 90٪ من الناس اللي بتحاول تشتغل على الإنترنت بتفشل، وده مش لأن المجال صعب، لكن لأنهم بيبدأوا غلط.
أغلب الناس أول ما تسمع عن الربح من النت بتدخل تشوف فيديوهات يوتيوب فيها ناس بتكسب آلاف الدولارات، فيتحمسوا، وبعدها يدوروا على طرق سريعة وسهلة يجيبوا منها فلوس، زي تطبيقات الكسب، أو مواقع مهام صغيرة. بيجربوا يومين أو أسبوع، مفيش نتيجة، يقولك "كل ده نصب".
الواقع إن الإنترنت مجال واسع زي أي شغل في الدنيا. لازم تتعلم، تجرب، تغلط، وتكمل. مفيش حاجة اسمها تكسب فلوس بدون تعب أو وقت. لازم تحدد أنت هتشتغل في إيه: كتابة؟ تصميم؟ تسويق؟ ولا حتى شغل مهام بسيطة؟ وتبدأ تتعلم صح من مصادر محترمة، مش من أي فيديو فيه كلمة "ربح مضمون".
نصيحة مني، لو ناوي تكمل في المجال ده:
ابدأ بمجال بسيط، مجاني، واشتغل عليه كل يوم شوية. متستناش نتيجة فورية. زي أي شغل، النجاح محتاج صبر.
وابعد عن الناس اللي بتبيع لك أوهام الربح السريع. شوف طريق يناسبك، وابدأ فيه خطوة خطوة.وفي نقطة مهمة لازم تبقى عارفها… الإنترنت مش ATM تسحب منه فلوس أول ما تدوس Enter، هو ببساطة وسيلة، وأنت اللي بتحدد هتستخدمها إزاي. في ناس فعلاً بتكسب آلاف الدولارات، بس بعد سنين تعب وتجارب فاشلة وتعليم مستمر. الفرق الوحيد إنهم مكملوش وقت ما الأمور صعّبت.
كمان من أكبر أسباب الفشل إن الناس بتشتت نفسها. تلاقيه بيجرب خمس مواقع في نفس الوقت، وبيسمع لخمس قنوات مختلفة، وكل يوم بيبدأ في طريقة جديدة. طب إمتى هتتعلم؟ إمتى هتتطور؟ الحل إنك تركز على طريقة واحدة بس، وتمشي فيها لحد الآخر، وبعد كده وسّع تدريجي.
أنا شخصيًا لما بدأت، كنت فاكر إني هكسب بسرعة، وضيعت وقت كتير في تجارب مالهاش لازمة. لكن لما ركزت على مجال واحد وبدأت أتعلم خطوة بخطوة، بدأت أحس بفرق، حتى لو بسيط في البداية، بس هو ده اللي بيكبر مع الوقت.
بردو مهم تفهم إنك لازم تطور نفسك، تتعلم مهارات جديدة، حتى لو بسيطة زي الكتابة، التصميم، الترجمة، أو استخدام أدوات الذكاء الاصطناعي. أي مهارة النهاردة بقت بتتقدر بفلوس، وكل دقيقة بتقضيها في التعليم هي استثمار هيرجعلك بعدين.
في الآخر، اللي بيكسب من الإنترنت مش أذكى واحد، لكن هو اللي صبر، واتعلم، وكمل لما غيره وقف.
فلو أنت ناوي تبدأ، أو بدأت ولسه مش شايف نتيجة، راجع نفسك:
هل بدأت صح؟ هل بتتعلم فعلاً؟ ولا بتجري ورا أي طريقة "مضمونة"؟
خد وقتك، وابدأ بذكاء، علشان يكون ليك مكانك الحقيقي في عالم الشغل أونلاين.
وصدقني، لو صبرت وبذلت مجهود، الإنترنت هيكافئك أضعاف ما كنت تتخيل.
